Derbi i kryeqytetit është kthyer në “frymarrjen” e tifozëve dhe gjithë sportadashëve. Jemi vetëm 5 ditë përpara ndeshjes së madhe që do të “paralizojë” kryeqytetin. “Ethet” ndjehen në masë, ndërsa si çdo derbi tjetër mes Tiranës dhe Partizanit, edhe ai i të mërkurës në orën 18:30 do të dhurojë emocione dhe spektakël si në fushën e lojës edhe jashtë saj.
Një nga lojtarët që ka pasur fatin të mbajë veshur të dyja fanelat kryeqytetase është Idriz Batha dhe kush më mirë se ai mund të analizonte këtë sfidë. Emocionet që ka përjetuar janë të mëdha, teksa golat e gjirokastritit kanë rezultuar vendimtar.
Në intervistën për “Newsport.al”, Batha ka treguar se i mungon shumë kryeqyteti dhe se mezi pret të kthehet në Shqipëri. Për shkak të mungesave për Tiranën e shikon të vështirë, por në fund mendon se Abazaj do të jetë vendimtar. 31-vjeçari ashtu si në fushën e lojës edhe pyetjes se kush fiton në këtë sfidë e “dribloi” mjaft bukur dhe me finesë, ku nënvizoi se gjithsesi do të jetë një lojë e bukur.
- Keni dy vite në Rumani, si po shkon aventura juaj te UTA Arad?
Ndjehem shumë mirë këtu, më pëlqen. Futbolli rumun ka shumë kualitet, personalisht po bëj lojë të mirë, por si ekip nuk gjendemi mirë në klasifikim. Qëndrimi në kategori është objektivi ynë.
- Gjatë kësaj periudhe, çfarë ju ka munguar më shumë nga Kryeqyteti?
Nga kryeqyteti më mungon çdo gjë, familja, miqtë, vendet e bukura, ushqimi. Më mungon gjithçka dhe mezi pres të kthehem… .
- A e keni ndjekur këtë sezon kampionatin shqiptar?
Po e kam ndjekur sa herë që kam pasur mundësi. Kam parë shumë ndeshje, ky sezon më duket shumë i luftuar, ku skuadrat luftojnë “dhëmb për dhëmb” për të arritur objektivat.
- Të mërkurën luhet derbi mes Tiranës dhe Partizanit, si duket ky duel?
Derbet si gjithmonë janë shumë të luftuara. Janë ndeshja më e rëndësishme e kampionatit shqiptar sidomos tani që luftojnë 2 ekipet e kreyqytetit për titullin. Këtë sfidë do ta shikoj me shumë kënaqësi, është “kopertina” e futbollit shqiptar.
- Keni përjetuar emocionet e derbit me të dyja fanelat, çfarë iu vjen mënjeherë në mendje dhe pse?
Sa herë qe e mendoj si ndeshje më kujtohen emocionet që krijojnë tifozeritë dhe sigurisht golat që kam shënuar në derbi. Padiskutim janë më të bukurit që mund të përjetojë një futbollist. Goli i parë që shënova në stadiumin e ri në derbi kundër Partizanit me kokë sepse ishte ndeshja e parë e dy ekipeve shqiptare që luanin në “Air Albania”, ishte një emocion i veçantë.
- Hasani, Hila dhe Behiratche do të mungojnë te Tirana. Sa do të ndikojnë sipas jush në derbi?
Sigurisht që çdo lojtar është i rëndësishëm kur bëhet fjalë për ndeshjen e sezonit. Por nga ana tjetër në një ndeshje të tillë duhet të sakrifikosh dhe të luash me 11-të lojtarë që japin 100% nga vetja e tyre për të fituar. Tirana e ka vuajtur pak pjesën e stolit të rezervave dhe sigurisht këtë ndeshje do ta ketë më të vështirë, por duhet të luajnë 11-tëshja më e mirë që mund të bëjnë diferencën.
- Nëse njëkohësisht edhe Partizani dhe Tirana do iu bënin një ofertë të majme për t’u rikthyer në kampionatin shqiptar, cilën do të zgjidhje? Ofertat nuk i mendoj me “nëse”. Për momentin jam i përqendruar te skuadra ku luaj dhe në rast se do të shkëpus marrëdhëniet në Rumani, sigurisht respekt maksimal për të dyja klubet… .
- Kush është tifozeria më e zjarrtë, Fanatics apo Guerrils?
E kam thënë shpesh që 2 tifozeritë kanë nevojë për njëra-tjetrën sepse pa rivalitet nuk duket asgjë bukur. Edhe për tifozët është e njëjtë. Për mendimin tim janë të mbrekullueshëm të dyja tifozeritë, shyqyr që janë se mesa kam parë këtë sezon stadiumet kanë filluar të boshatisen. Kjo padiskutim është një humbje e madhe për futbollin shqiptar.
- Për kë do të bëni tifo të mërkurën?
Le të fitojë më i miri, pak rëndësi ka për kë bëj tifo unë. (QESH).
- 1 derbi për Tiranën dhe 2 për Partizanin këtë sezon. Çfarë ngjyre do të ketë kryeqytetit në derbin e fundit? Rezultati sipas jush?
(QESH). Iu përgjigja, le të fitojë më i miri, por në këtë rast di të them se do të jetë një ndeshje e madhe për të dyja ekipet.
- Cili lojtar do të jetë vendimtar?
Mendoj se Kristal Abazaj do të vendosë në këtë sfidë. /Floridona ADEMAJ/
Lexo gjithashtu
