Ka lindur në Itali, por ndjenja e patriotizmit e ka “pushtuar” të gjithin. Luan për ngjyrat kuqezi dhe nuk e ka vënë kurrë në dyshim se cilin flamur do të përfaqësojë. Alen Ndreu, sulmuesi i talentuar i kombëtares shqiptare ka dhënë një intervistëë enkas për Newsport.al duke treguar fillimet dhe synimet e tij.
Zoti i ka falur fizikun e mrekullueshëm, 1.93 metër i gjatë. Tashmë është detyra e tij të stërvitet si duhet për të arritur majat në aspektin profesional. I rritur me driblimet e Cristiano Ronaldos, sulmuesi i Kombëtares U-19, shpreson që së shpejti do të marrë ftesë nga Shpresat e Alban Bushit.
Por, nuk mohon dëshirën që të konkurrojë denjësisht Armando Brojën në ekipin e parë. Është 17 vjeç dhe tashmë është transferuar nga Pordenone te Venezia në Seria D të Italisë. Ëndrrat i ka të mëdha, po ashtu edhe motivimin për të shkuar sa më lart me fanelën kuqezi.
– Jeni lindur në Itali, por jeni pjesë e Kombëtares shqiptare. Si është të luash për ngjyrat kuqezi?
Po, kam lindur në Venezia të Italisë. Është një emocion i veçantë dhe ndihem shumë krenar që kam pasur fatin të vesh fanelën kuqezi. Shpresoj që ëndrra ime të vazhdojë.
– A keni pasur ndonjëherë ftesë nga kombëtarja e Italisë?
Jo, nuk kam pasur. Por, edhe po të isha ftuar, dëshira ime ka qenë gjithmonë të luaj për kombëtaren shqiptare.
– Jeni grumbulluar me Shqipërinë U-17, U-18 dhe U-19. A beson se duhet të të jepet mundësia për U-21?
Kam luajtur me kombëtaret e moshave. Shpresoj dhe po pres një ftesë nga Shqipëria U-21.
– Pas sa kohësh e sheh veten në ekipin e parë të kombëtares shqiptare?
Dëshira ime është luaj sa më shpejt me ekipin e parë. Megjithatë kjo do shumë punë, le të themi edhe pak fat.
– Luani si qendërsulmues, pikërisht reparti që Kombëtarja jonë ka një lojtar si Armando Broja. A jeni gati ta rivalizoni?
Armando Broja e ka treguar se është një lojtar i shkëlqyer. Unë do të punoj fort për të shfaqur vlerat e mia.
– Në aspektin personal, si po shkon karriera juaj në Itali?
Jam i kënaqur, pasi këtë vit po provoj një eksperiencë të re e cila është shumë e rëndësishme për vazhdimin e karrierës sime.
– Jeni vetëm 17 vjeç, por fiziku juaj ju ndihmon të provoni liga më forta se D. Cili është synimi për të ardhmen?
Jam këshilluar nga dirigjentët e Venezies FC që të shkoja në skuadrën e parë të Seria A që të fitoj më shumë eksperiencë për karrierën time. Synimi im është të punoj fort dhe të arrij sa më lart.
– Kush është idhulli juaj?
Jam rritur gjithmonë duke ndjekur stilin e lojës së Cristiano Ronaldos. Portugezi është idhulli im.
– Në stilin tënd të lojës, cilit lojtari shqiptar apo të huaj i ngjason?
Mendoj dhe besoj se më shumë Fernando Torresit.
– Ku e sheh kombëtaren shqiptare pas 4 viteve?
Kombëtarja shqiptare ka bërë shumë hapa përpara dhe mendoj që do të jetë gjithmonë e më lart.