Federata Shqiptare e Futbollit ka arritur t’ia dalë për të sjellë në Shqipëri finalen e “Conference League” që do të luhet në vitin 2022!
Lajmin e ka bërë me dije Liga Profesioniste që përmes një njoftimi në kanalin zyrtar bën me dije që Komiteti Ekzekutiv i UEFA-s i ka besuar Shqipërisë zhvillimin e kësaj ndeshje me përmasa të mëdha.
Vendi ynë arriti të mposhtte Irlandën e Veriut dhe Finlandën duke fituar të drejtën për të zhvilluar këtë ndeshje në stadiumin kombëtar.
“FSHF sjell në Shqipëri një finale të madhe europiane!
“Air Albania Stadium” mirëpret finalen e “Conference League” në vitin 2022!
Komiteti Ekzekutiv i UEFA-s është mbledhur sot përmes video-konferencës dhe mori një vendim historik për Shqipërinë!
Finalja e “UEFA Conference League”, turneut më të ri europian për klube që do të nisë sezonin e ardhshëm, do të zhvillohet në stadiumin kombëtar “Air Albania” në vitin 2022!
Kjo është hera e parë në historinë e sportit shqiptar që vendi mirëpret një finale europiane të këtyre përmasave.
Shqipëria ishte një nga kandidatet kryesore për zhvillimin e kësaj finaleje, por arriti të lërë pas Irlandën e Veriut dhe Finlandën.
Në këtë mbledhje historike mori pjesë edhe Presidenti i Federatës Shqiptare të Futbollit, Armand Duka, njëherësh edhe anëtar i Komitetit Ekzekutiv të UEFA-s, i cili ka pasur një rol kyç duke lobuar vazhdimisht për këtë vendim.
Gjatë mbledhjes Presidenti Duka falënderoi të gjithë anëtarët e Komitetit Ekzekutiv për mbështetjen që po i japin Shqipërisë dhe në veçanti futbollit shqiptar.
Një event i këtyre përmasave është një mundësi fantastike promovimi për Shqipërinë, që do të jetë në qendër të vëmendjes për disa ditë me radhë.
Komiteti Ekzekutiv i UEFA-s mori edhe disa vendime të tjera në mbledhjen e zhvilluar sot në lidhje me finalet e kompeticioneve të UEFA-s”, shkruhej në njoftimin e Ligës Profesioniste.
Loading ...
