Histori e jashtëzakonshme/ 11 yjet që lindën në Ballsh, njihuni me formacionin e milionerëve

Shkruar nga NEWSPORT

Një nga skuadrat që ka spikatur për menaxhimin dhe evidentimin e lojtarëve në kampionatin shqiptar në vitet e fundit është padyshim edhe Bylis. Edhe pse gjatë 2-3 viteve të fundit ka pasur luhatje duke qenë sa në Superiore, në Kategorinë e Parë, suksesi i 2013-ës që shkoi deri në finale të Kupës së Shqipërisë mbahet mend nga tifozët ballshiot. Një finale kjo e humbur ndaj Laçit. Gjithsesi, strategjia e klubit të Bylisit për t'iu dhënë mundësi futbollistëve të talentuar për t'u evidentuar dhe më pas për t'i shitur në skuadra të mëdha është padyshim një strategji për t'u marrë shembull.

Ndërkohë, emrat që kanë luajtur dhe kanë spikatur te Bylisi janë të shumtë, por mes tyre mund të përzgjidhet një 11-she që përbën një formacion vërtet të frikshëm, nëse do të luanin të gjithë në të njëjtën periudhë. Po flasim për lojtarë që janë ende aktivë në futbollin e luajtur, madje në skuadra me emër jo vetëm në kampionatin shqiptar, por edhe ato përtej kufijve.

Stivi Frashëri- Kaloi nga Bylisi te Tirana në 2014-ën, ndërsa gjatë periudhës që u aktivizua me bardheblutë, portieri korçar mori ftesë nga trajneri De Biazi për t'u grumbulluar me Kombëtaren kuqezi. Por, më pas u largua nga 24 herë kampionët e vendit për të luajtur sërish me Bylisin. Tashmë është pjesë e Flamurtarit.

Hektor Idrizaj- Mbrojtësi i djathtë u aktivizua me Bylisin nga 2008–2013. Më pas kaloi te Teuta. Me durrsakët, Idrizaj u aktivizua për 1 sezon për të kaluar te Flamurtari, ku ishte pjesë e kësaj skuadre deri sezonin e shkuar. Tashmë vlonjati luan me kampionët në fuqi të Superiore, Skënderbeun.

Albi Alla- I mjaftuan vetëm pak ndeshje me Bylisin në sezonin e shkuar dhe u kthye në një nga qendërmbrojtësit më të mirë në Superiore. Tashmë, Albi Alla është kthyer në një titullar te Kukësi, skuadër ku u transferua gjatë merkatos së verës.

[caption id="attachment_37708" align="alignleft" width="300"] adebayo-adigun Adebayo Adigun[/caption]

Adebayo Adigun- Mbrojtësi nigerian u aktivizua me Bylisin nga 2012-2014. Tashmë në moshën 25-vjeçare, Adebayo luan në kampionatin e Letonisë me FK Ventspils. Me Bylisin, mbrojtësi luajti 26 ndeshje dhe shënoi tre gola, ndërsa ende sot mbahet mend si një nga lojtarët më të mirë që kanë pasur ballshiotët në vitet e fundit.

Kire Ristevski- Absolutisht një nga lojtarët më të mirë që kanë mbërritur në Shqipëri në vitet e fundit. Mbrojtësi i majtë i kombëtares së Maqedonisë ka luajtur me Bylisin në vitet 2011-2013. 79 ndeshje dhe dy gola të shënuar për ish-kapitenin e ballshiotëve, i cili më pas u aktivizua me Slavia Sofian në Bullgari, Tiranën në Shqipëri, Rabotniçkin në Maqedoni, ndërsa këtë sezon është duke luajtur me Vasas, ekip që kryeson kampionatin e Hungarisë.

Polizoi Arbri- Edhe pse i pafat gjatë 12 muajve të fundit për shkak dëmtimesh, beratasi ka qenë një lojtar që ka spikatur jo pak në kampionatin shqiptar, ndërsa me Bylisin është aktivizuar në sezonet 2009-2011. Në atë kohë si mesfushor i krahut, Arbri ka lënë gjurmë te ballshiotët, ndërsa më pas u aktivizua me Flamurtarin, Vllazninë e këtë sezon është pjesë e Kukësit.

Olsi Teqja- Ishte pjesë e skuadrës së Bylisit në sezonin që skuadra ballshiote shkoi në finalen e Kupës së Shqipërisë. Olsi Teqja u aktivizua me Bylisin nga 2011-ta deri në 2013-ën për të kaluar më pas te Laçi. Prej sezonit të kaluar është pjesë e Tiranës, ku nga mesfushor, është duke luajtur në qendër të mbrojtjes bardheblu.

Ardit Hoxhaj- Lojtari që "çmendi" Superligën në sezonin e kaluar, kapiteni i Bylisit që shënoi 7 gola në elitën e futbollit shqiptar, tashmë ka kaluar te Skënderbeu. Talenti vlonjat u rrit shumë profesionalisht te Bylisit, ku u afirmua si një sulmues me prespektivë. Tashmë ka një tjetër sfidë, atë për të qenë protagonist te Skënderbeu.

[caption id="attachment_37710" align="alignleft" width="187"] Peter Olayinka[/caption]

Peter Olayinka- Bylisi e mori nga Nigeria që në moshën 16-vjeçare dhe e aktivizoi me skuadrën e moshave. Më pas në moshën 17-vjeçare debutoi me ekipin e parë. Nga Bylisi kaloi te Skënderbeu ku u shndërrua në një nga të preferuarit e tifozërisë korçare. U transferua nga Skënderbeu te Gent në Belgjikë për 1 milion euro dhe tashmë është huazuar në Çeki te Dukla Pragë.

James Adeniyi- Sulmuesi 23-vjeçar luajti me Bylisin për një sezon, 2012-2013. Më pas kaloi te Laçi ku u shndërrua në një nga lojtarët më të mirë të Superiores. Kaloi te Skënderbeu sezonin e shkuar, ekip në të cilin bën pjesë momentalisht.

[caption id="attachment_37713" align="alignleft" width="292"] madjo-bertrand-guy Madjo Bertrand Guy[/caption]

Madjo Bertrand Guy- Sulmuesi 32-vjeçar nga Kameruni u aktivizua me Bylisin në sezonin 2010-2011. Një lojtar që ka lënë gjurmë me ballshiotët dhe që u shit për 40 mijë euro te Stevenage në ligat inferiore të kampionatit anglez. Gjatë karrierës së tij, Madjo Guy shënuar 212 gola në total me skuadrat që është aktivizuar. Momentalisht luan në Angli me Tranmere Rovers.