Fernando Augusto Rodrigues de Araujo (Fernando Augusto) pritet të jetë goditja e radhës për Partizanin. Burime të besueshme bëjnë me dije për Newsport.al që drejtuesit janë prej disa ditësh në bisedime me mbrojtësin brazilian. Vetëm Emiliano Musta në linjën e majtë të prapavijës nuk bind dhe kësisoj është parë e nevojshme ndërhyrja në këtë repart të fazës difensive. 28-vjeçari luan në Maqedoninë e Veriut me ekipin e Makedonijas Gjorce Petrov.
Këtë edicion futbollistik është aktivizuar në 18 ndeshje, ku ka arritur të japë dhe 4 asiste. Forma e mirë që po kalon ka bindur drejtuesit e kuq që ta kenë në organikën e tyre për ta vënë në dispozicion të trajnerit Dritan Mehmeti. Me afrimin e tij te Partizani do të shtohet konkurrenca në linjën e majtë të mbrojtjes dhe kësisoj vendi i titullarit për Mustën rrezikohet. Drejtuesit janë të bindur që braziliani do të mbërrijë së shpejti në Tiranë, aty ku do të hedhë të “zezën mbi të bardhë” për pjesën tjetër të sezonit.
Prej 3 sezonesh, mëngjërashi aktivizohet në kampionatin e Maqedonisë së Veriut, ndërsa më parë ka provuar të luajë në Brazil me ekipe si Rio Preto, Caldense, Flamengo etj. Pritet me interes të shihet se si do të përfundojë kjo tratativë, ku duhet thënë se palët kanë një akord në parim. /Newsport.al/
Lexo gjithashtu
