Kupa e Shqipërisë rikthehet nesër me ndeshjet çerekfinale ku përplasjet interesante nuk kanë sesi të mungojnë. Një ndër to është edhe Tirana – Korabi e cila do të luhet në orën 13:00 në ‘Selman Stërmasi’. Në letër sigurisht pritet një fitore e lehtë e kryeqytetasve duke parë diferencat në ekip, por historia flet ndryshe.
Dibranët janë faktor i rëndësishëm në historinë e bardhebluve në vitet e fundit. Përplasja e fundit mes tyre daton më 12 nëntor 2020 po në Kupën e Shqipërisë, atëherë kur Tirana vinte si kampione në fuqi nën drejtimin e Egbos. Ajo ndeshje shkaktoi tërmet te Tirana e cila u mposht 0-1 me golin e një 22-vjeçari të quajtur Xhuliano Skuka në minutën e 119’.
Eliminimi nuk u prit aspak mirë në kampin bardheblu dhe drejtuesit njoftuan shkarkimin e Emmanuele Egbo nga stoli i trajnerit, një vendim që pati kundërshtim të fortë nga tifozëria. Një ditë më vonë, në pankinë u emërua Nevil Dede i cili u shkarkua përsëri më vonë, për të ardhur më pas te Orges Shehi. Historia më pas dihet, me teknikun durrsak që fitoi një titull kampion dhe një Superkupë. Por, zanafilla e gjithë kësaj është ai gol i Skukës në ‘Skënder Halili’.
Tani, Tirana vjen si nënkampione, Korabi sërish në Kategorinë e Parë, Skuka iku te Partizani, u shit për 1.4 milionë euro e u rikthye përsëri si i kuq. Orges Shehi është trajner i Partizanit, ndërsa Tirana ka Julian Ahmatajn në stol. 3 vite e 2 muaj më vonë, Tirana e Korabi do të përballen sërish në Kupën e Shqipërisë.
[gallery jnewsslider="true" jnewsslider_zoom="true" ids="720526,720528,720527,720529"]
Lexo gjithashtu
