Sot, rikthehet Kategoria Superiore. Pas një pauze thuajse 3 mujore për shkak të pandemisë së COVID-19, futbolli elitar zbret sot në fushë. Katër sfida luhen në orën 17:00, ndërsa përballja mes Partizanit dhe Skënderbeut është programuar në orën 20:00.
Para rinisjes së aktivitetit futbollistik s’mund të mungonte as urimi i presidentit të Federatës Shqiptare të Futbollit, Armand Duka. Ky i fundit ka uruar të gjithë “aktorët” e kampionatit tonë duke i kujtuar zbatimin e masave për distancimin fizik.
Sigurisht që tifozët janë mungesa më e madhe e këtij rifillimi, të cilët do të jenë të detyruar t’i ndjekin ekipet e tyre nga televizori. Në urimin e tij në kanalin zyrtar, presidenti i FSHF-së shkruante:
“Të dashur futbollistë, tifozë dhe miq të futbollit!
Pas një periudhe të vështirë për të gjithë vendin, por edhe gjithë botën, për shkak të pandemisë Covid-19 më në fund futbolli rikthehet sot me rifillimin e kampionatit.
Kjo ndërprerje e menjëhershme e jetës sportive na ka dëmtuar, edhe ekonomikisht, por sigurisht dëmi më i madh ka qenë ai sportiv. Futbollistët e të gjitha niveleve, profesionistë, amatorë, fëmijët, nuk e kanë shumë të lehtë që të kapin të njëjtën formë sportive. Ndërprerja patjetër që ka lënë shenjën e saj dhe unë uroj ta kalojmë sa më parë, edhe pse jam i ndërgjegjshëm se nuk do të jetë e lehtë.
Edhe një herë përfitoj nga rasti t’u kujtoj të gjithë futbollistëve,
zyrtarëve të klubeve dhe stafeve organizative që të jenë sa më të kujdesshëm e
të zbatojnë rregullat e distancimit social dhe protokollet shëndetësore në
lidhje me zhvillimin e ndeshjeve në këto kushte. Protokolle me të cilat të
gjithë aktorët dhe faktorët janë njohur tashmë.
Unë jam i bindur, që ju dhe stafet tuaja, do të tregoheni të kujdesshëm në këtë
drejtim, në mënyrë që gjithçka të shkojë sa më mirë.
Ndihem i keqardhur që ne nuk do të kemi mbështetjen e spektatorëve nëpër
stadiume. Uroj që shumë shpejt masat kufizuese të lehtësohen dhe tifozët të
kthehen në stadiume për të mbështetur skuadrat e tyre të zemrës.
Uroj nga zemra që kampionati të vazhdojë të na dhurojë sërish emocione, lojë të
bukur dhe Fair-play.
Edhe një herë, urimet e mia më të mira për rifillimin e kampionatit!
Suksese të gjithëve!
Armand Duka
President
Federata Shqiptare e Futbollit”.
Lexo gjithashtu
