Pasojat e dhunës në ndeshjen e Partizanit kundër Flamurtarit, ishin vërtetë të rënda që e kalonin plotësisht konotacionin sportiv. Fotografi i klubit të kuq, Shkëlqim Ramaj u dhunua nga tifozët e kuq, të cilët rrezikojnë seriozisht dënimin nga Komisioni i Disiplinës.
Shumë spekulime ka pasur rreth ngjarjes së shëmtuar të ndodhur të shtunën e javës që lamë pas në stadiumin "Selman Stërmasi". Fillimisht ishte klubi i kuq që doli në deklaratë për shtyp teksa theksonte se Ramaj ishte provokator i dhunës së nisur në fitoren 3-1 kundër vlonjatëve.
Për këtë dhe për të mësuar edhe më shumë rreth asaj që ka ndodhur, newsport.al kontaktoi zyrtarin e klubit të Flamurtarit. E vetmja gjë që atij i kishte mbetur nga ajo ndeshja, ishte kart-memoria pasi aparati kishte "fluturuar" në tribunën e tifozëve të kuq. Ai ka një mesazh për zyrtarët e klubit të Partizanit si dhe është me sytë nga Komisioni i Disiplinës.
- Çimi, çfarë ndodhi
në ndeshjen kundër Partizanit?
Ajo që ndodhi në ndeshje me Partizanin u pa shumë qartë nga të gjithë sepse
shyqyr Zotit, sot çdo gjë transmetohet live dhe nuk është si në vitet 2000.
Ishte momenti i golit dhe si çdo festim çunat e ekipit më thirrën për të bërë
foton që tashmë është bërë rituale në çdo festim. Ndërkohë që bëja foto, në
krahun e djathtë timin, disa nga tifozët kishin hipur mbi hekura dhe filluan të
ofendonin si futbollistët, edhe mua.
- U tha se provokuat
tifozët, megjithatë kurrsesi dhuna nuk justifikohet. A mund të na tregoni se
çfarë komunikuat me ata?
E vetmja gjë që i kam thënë njërit nga tifozët ishte që ata kanë festuar në
Vlorë dhe asnjëherë nuk janë ofenduar apo ndaluar. Ndërkohë që vazhdonin
ofendimet dhe gurët drejt meje. Njëri më kërkoi që të hiqja aparatin dhe mos të
bëja foto duke ofenduar. Ai gjesti im që komentohet si provokim është që nuk
jemi në ambientin që të bëjmë të fortin sepse edhe në Vlorë nuk u ka ndaluar
njeri.
- A keni kontaktuar me ndonjë nga drejtuesit e Partizanit?
Deri në këto momente nuk kam komunikuar me asnjë nga drejtuesit e Partizanit. E vetmja që më ka pyetur nëse isha mirë, është zyrtarja e klubit Xhiliola.
- Pas atij momenti u ndëshkua me karton të kuq edhe Andi Ribaj. Çfarë ndodhi me sulmuesin fierak?
Rasti i kartonit ishte vërtetë për të qeshur sepse Ribaj ishte duke u mjekuar. Ndërkohë që ngrihet edhe tifozi me aparatin tim, ulet dhe merr gurë për ta goditur. Ribaj i ka thënë që nuk bëtë mirë që vepruat kështu sepse në Vlorë nuk u prek njeri me dorë.
- Klubi i Partizanit doli në deklaratë zyrtare ku theksonte se nuk ishit zyrtar i Flamurtarit duke u distancuar komplet nga ngjarja. Mesazhi juaj për të kuqtë?
Mesazhi për Partizanin? Në çdo ndeshje, në Vlorë vjen me fotograf dhe kameraman e asnjëherë nuk i ka shënuar në ndonjë protokoll. Mund t'iu tregoj se nuk ka protokoll për fotografin. Fotografi diskutohet në mbledhjen para ndeshjes mes drejtuesve të dy skuadrave, arbitrave dhe delegatit të ndeshjes. Jane ata që vendosin dhe për ngjyrën e jelekut. Partizanit, deri më sot nuk i është dhunuar asnjë pjesëtar stafi apo fotograf në Vlorë.
- Tashmë, Disiplina do të thotë fjalën e fundit të saj. Çfarë prisni nga organi i drejtësisë sportive?
Pres nga Disiplina vetëm të zbatojë rregulloren për dhunë ndaj 1 zyrtari klubi. /Retin TOKA/
Lexo gjithashtu
