“Abissnet Superiore” ka ulur siparin për javën e katërt. Verdikte të rëndësishme, por edhe befasuese. Humbja 1-0 e Partizanit kundër Erzenit ishte rezultati surprizë i kësaj jave. Shijakasit mposhtën të kuqtë minimalisht në stadiumin “Elbasan Arena”.
Kukësi barazoi 0-0 me Teutën, takim që solli largimin e trajnerit Skënder Gega. Shumë futbollistë që shkëlqyen dhe janë përzgjedhur në formacionin e javës në Newsport.al. Më poshtë njihuni me 11-shen titullare dhe trajnerin fitues.
FORMACIONI I JAVËS:
Angelo Tafas – Kukësi barazoi në transfertë kundër Teutës, por po të mos ishte për “gardianin” e verilindorëve, vështirë se do të largohej me pikë nga “Niko Dovana”. Paraqitje pozitive për portierin e njohur që tregon edhe një herë se meriton të jetë pjesë e titullarëve te kuksianët.
Emiliano Musta – Çfarë motorri ka fituar Egnatia në këtë sezon futbollistik. Mbrojtësi i majtë i rrogozhinasve ishte protagonist në fitoren 3-0 kundër Vllaznisë. Asist dhe gol i shënuar i elbasanasit duke shkëlqyer në një takim ku shkodranët futeshin si favoritë në fushë.
Gëzim Krasniqi – Shtatlarti i prapavijës së Erzenit ishte ndër më të mirët në fushë kundër Partizanit. Dha një kontribut të madh me shiritin e kapitenit në krah duke i dhënë 3 pikë shijakasve.
Alessandro Kacbufi – Egnatia i dha leksione Vllaznisë në fitoren 3-0. Pjesë e kontributit të rëndësishëm ishte edhe 21-vjeçari Kacbufi. Në qendër të mbrojtjes i riu tregoi siguri dhe komoditet. Vendin e titullarit padyshim e meritoi duke qenë titullar në triumfin e rrogozhinasve.
Aleksandër Trumci – E kanë quajtur ndryshe si Dani Alves i Bylisit. Autor i golit të shënuar me Laçin, 21-vjeçari shkëlqeu në një sfidë që duhej doemos fituar. E ardhmja e ndritur në krahun e djathtë të mbrojtjes. E ka nisur si sulmues, por ka arritur të bindë në prapavijë.
Alan Calbergue – Shtatshkurtri i shijakasve arriti të fitonte duelin në mesfushë me Partizanin duke shkatërruar aksionet e të kuqve. Rezultat surprizë për Erzenin që mposhti një kundërshtar kandidat për titullin kampion në Superiore.
Gjelbrim Taipi – Kukësi nuk ishte në ditën më të mirë, por kapiteni i verilindorëve bëri një paraqitje pozitive. Kuksianët barazuan 0-0 pa gola ndaj Teutës, megjithatë mesfushori me eksperiencën e tij i jep shumë siguri verilindorëve në këtë repart.
Lorenco Vila – Çdo vit mesfushori shkëlqen me Teutën. Edhe ndaj Kukësit ishte si shigjetë në linjën e djathtë të fushës. 1 pikë me trajnerin Bledi Shkëmbi. Durrsakët kanë një pikë referimi siç është 23-vjeçari durrsak.
Xhulio Mehmeti – Nëse luan me Kastriotin, në mesfushë duhet të marrësh masat për të zhbalancuar forcën e Mehmetit. Çfarë forme të mrekullueshme po kalon i riu nën urdhrat e trajnerit Çela. Në mesfushë duket se është bërë “doktor” i vërtetë. Superiorja ka fituar një futbollist të së ardhmes.
Dzon Delarge – Në merkaton e verës, Egnatia bëri disa afrime për nga emrat të panjohur për elitën e futbollit në vend. Por, javë pas jave po tregojnë vlerat e tyre në Abissnet Superiore. Sulmuesi 32-vjeçar shkëlqeu kundër Vllaznisë duke fituar me rezultatin 3-0 kundër rrogozhinasve.
Patrick Nonato – Partizani u mposht me Erzenin. Sulmuesi brazilian shkëlqeu dhe shënoi një gol të pazakontë në kampionatin shqiptar. Protagonist me mënyrën e realizimit, e mrekullueshme për elitën në vend. Një gol i babarabartë me 3 pikë.
Trajner: Xhevahir Kapllani
Erzeni fitoi në transfertë kundër Partizanit, një ndeshje që u triumfua edhe nga trajneri Kapllani me lëvizjet e bëra në fushë. Asnjë gol i pësuar në 4 javë të Superiores. Meritë e jashtëzakonshme nga “timonieri” durrsak. Padyshim trajneri i javës në elitën e futbollit shqiptar.
