Kategoria Superiore mbylli ditën e sotme javën e 5-të ku nuk munguan as rezultatet surprizë. Tirana dhe Teuta nuk fitojnë sërish dhe barazojnë në ndeshjet e tyre ndaj Kastriotit dhe Bylisit. Kukësi merr fitoren e radhës dhe I shakton Vllaznisë humbje e parë të sezonit. Partizani i Ilir Dajës “shkëmoq” 4-0 Skënderbeun, ndërsa Laçi fiton me goleadë 6-1 ndaj Apolonisë. Newsport.al ju sjell formacionin dhe trajnerin më të mirë të javës.
Visar Bekaj (Tirana): Tirana nuk fiton sërish duke barazuar 1-1 ndaj Kastriotit. Nëse bardheblutë nuk humbën në ndeshjen e sotme, padyshim që merita ishte e portierit Bekaj. Shpëton shumë herë skuadrën nga goli duke qenë një nga më të mirët në fushën e lojës.
Albion Marku (Laçi): Fitore e thellë 6-1 ndaj Apolonisë dhe e para sezonale. Në goleadën e kurbinasve kishte vend edhe për mbrojtësin që bëri një paraqitje mjaft pozitive. I pandalshëm nga krahët e në fund tund edhe rrjetën për të kompletuar përformancën e tij.
Alan (Bylis): Barazimi i radhës për Bylisin që këtë herë kishin përballë një nga skuadrat që pretendon për titullin kampion, Teutën. Mbrojtës ishte i pakalueshëm sot duke bllokuar mjaft mirë dyshen Hebaj-Krasniqi, por edhe Bregun. Me një lojtar më shumë për rreth 30 minuta, Bylis edhe mund të kishte fituar ndeshjen, por rastet e krijuara nuk u konkretizuan me gol.
Silvestër Shkalla (Kastrioti): Kastrioti është surpriza e sezonit e këtë herë krutanët ndalin në barazim 1-1 kampionët e Superligës, Tiranën. Shkalla e nisi ndeshjen si titullar në mungesë të Boyom dhe nuk zhgënjen. Mbrojtësi me eskperiencë bën një paraqitje mjaft të mirë duke mos lejuar sulmuesit e Tiranës të rrezikojnë portën e mbrojtur nga Hidi.
Rudolf Turkaj (Laçi): Fitore e thellë 6-1 ndaj Apolonisë për të marrë fitoren e parë në Superligë. Mbrojtësi i krahut të majtë bën gjithçka mirë në këtë ndeshje duke qenë I pakalushëm në krahun e tij. Ndërmerr aksione të rrezikshme nga krahu i tij dhe furnizon më shumë topa fazën sulmuese.
Esat Mala (Partizani): Assit dhe supergol nga faulli. Esat Mala ishte njeriu i ndeshjes në fitoren e pastër 4-0 ndaj Skënderbeut. Mesfushori duket se ka gjetur formën e tij më të mirë dhe kjo shihet në fushën e lojës. Me Dajën në stol është rikthyer edhe Mala që jemi mësuar të shikojmë.
Gjelbërim Taipi (Kukësi): U afrua me bujë për të bërë diferencën dhe tashmë po e tregon veten. Taipi është lideri i mesfushës së Kukësit, i saktë në ndërhyrje e tij, bën presion ndaj çdo kundërshtari dhe nis aksionet për skuadrën e tij. Ishte çështje kohe që mesfushori të shfaqte të gjithë potencialin e tij dhe nga ndeshja në ndeshje po rritet akoma më shumë edhe nga ana fizike.
Jurgen Bardhi (Partizani): Roli I ri në fushë me Dajën dhe Bardhi shkëlqen. Shënon golin e parë për Partizanin në fitoren 4-0 ndaj Skënderbeut dhe tregon një formë mjaft të mirë. Sa herë prek topin është rrezik konstant për mbrojtjen korçare dhe çdo aksion në sulm kalon nga këmbët e tij.
Agim Ibraimi (Kukësi): Është ai lideri i ri i Kukësit. Pas ndeshjes së mirë pak ditë më parë ndaj Laçit, Ibraimi bën sërish një ndeshje perfekte në Shkodër. Dopietë për të përmbysur Vllazninë që deri më tani nuk kishte pësuar asnjë humbje. E vetmja gjë negative ishte dëmtimi dhe te Kukësi të gjithë “kryqëzojnë” gishtat që Ibraimi të mos ketë asgjë serioze pasi do të ishte një humbje e madhe për ta.
Kirian Nuabeze (Laçi): Bomberi rikthehet të bëjë atë që di të bëjë më mirë. 3 gola ndaj Apolonisë për të treguar se Laçi është aty dhe do të tentojë deri në fund për titullin kampion. Nuabueze lë pas dëmtimin dhe sot rikthehet titullar duke shënuar 3 gola në fitoren e thellë 6-1 që Laçi merr ndaj Apolonisë.
Theophilus Solomon (Partizani): Këtë sezon është shumë më ndryshe nga ai I kaluari. Ka fituar vetëbesim dhe në fushë është I pandalshëm. Luan në krah të sulmit dhe është gjithmonë një rrezik për mbrojtjen e Skënderbeut. Në fund shpërblehet edhe me gol që mbylli siparin e golave 4-0 ndaj korçarëve. Siç duket “efekti” Daja ka bërë që edhe Solomon të tregoi vlerat e tij në këtë edicion të ri të Superligës.
Trajner: Rrahman Hallaçi (Kukësi): Dy ndeshje në drejtim të Kukësit, dy fitore dhe e fundit ndaj Vllaznisë që deri më tani nuk kishte pësuar asnjë humbje në kampionat. Edhe pse nuk është trajneri i parë duket që ka punuar mjaft mirë me skuadrën në mungesë të trajnerit Gega. Vllaznia ishte analizuar me detaje dhe Hallaçi I dinte mjaft mirë pikat e dobëta të kundështarit e kjo bëri që të merrnin fitoren e dytë radhazi. T’I shkaktosh humbjen e parë Vllaznisë në kampionat dhe në shtëpi nuk është pak e kjo padyshim e bën Hallacin trajnerin më të mirë të javës së 5-të.
Loading ...
