Kategoria Superiore mbylli ditën e sotme javën e 20-të. Vllaznia ngec në barazim 1-1 ndaj Skënderbeut, ndërsa Partizani fitoi 1-2 në transfertë ndaj Kukësit. Ditën e djeshme, Teuta mposhti Tiranën 0-1, Laçi fitoi ndaj Kastriotit 1-0, si dhe Bylis që mposhti minimalisht 0-1 Apoloninë në ndeshje direkt për mbijetesë. Newsport.al ju sjell edhe 11-shen më të mirë të kësaj jave si dhe trajnerin fitues.
Mario Dajsinani (Skënderbeu): Skënderbeu merr një pikë të artë në shtëpi duke barazuar 1-1 ndaj Vllaznisë kryesuese. Nëse korçarët dalin të pamposhtur nga ky takim një meritë të madhe ka edhe portieri Dajsinani. Pret shumë goditje të lojtarëve të Vllanznisë, ndërsa nuk ka çfarë të bëjë te goli I pësuar nga penalltia.
Esat Mala (Partizani): Në ndeshje të rëndësishme, trajneri Ilir Daja I beson gjithmonë krahun e djathtë të mbrojtjes. Mala nuk zhgënjen dhe e bën më së mirë edhe këtë rol. Nga krahu i tij nuk kalon askush, ndërsa jep një pasim fantastik për Asanin që më pas sulmuesi jep asisti për golin e Çinarit.
Mevlan Adili (Vllaznia): Shtrëngon dhëmbët për të qenë në fushë edhe pse jo në 100% e tij për shkak dëmtimi. Adili tregon se është një pikë e rëndësishme për këtë Vllazni dhe në qendër të mbrojtjes është një lider. Merr pjesë edhe në fazën sulmuese të skuadrës duke e ndihmuar me disa pasime të rëndësishme.
Eneo Bitri (Partizani): Nga ndeshja në ndeshje po përmirësohet ndjeshëm. Së bashku me Belicën ka krijuar një dyshe në mbrojtje që nuk çahen kollaj. Sot kishte përballë Ibraimin dhe Eze, por që të dy lojtarët e Kukësit e kanë të pamundur që të kalojnë nga ai. Një ndeshje perfekte nga Bitri që padyshim meriton një vend në formacionin e javës.
Alexandros Kouros (Teuta): Teuta mori një fitore shumë të rëndësishmë në transfertë 0-1 ndaj Tiranës. Mbrojtësi i krahut të majtë bëri një ndeshje shumë të mirë duke bllokuar mjaft mirë Calen, Muçin apo edhe Seferin. Kouros ishte shumë aktiv edhe në fazën sulmuese pasi me deportimet e tij shërbeu shumë herë për shokët e skuadrës.
Regi Lushkja (Laçi): Laçi fitoi me rezultatin minimal 1-0 ndaj Kastriotit duke rregjistruar fitoren e 5-të radhazi në kampionat. Goli i vetëm i ndeshjes u shënua nga Lushkja që me një gjuajte të bukur jashtë zone mposhti Isli Hidin. Çdo aksion i Laçit kalonte nga këmbët e mesfushorit kavajas që tregoi edhe njëherë tjetër që është një pikë e rëndësishme e kësaj skuadre që këtë sezon ëndërron titullin kampion.
Lorenoc Vila (Teuta): Shënon një gol me vlerë 3 pikëshi duke ndëshkuar sërish Tiranën. Gjendet në momentin e duhur dhe bën një marrje spektakolare të topit, ndërsa edhe finalizimi ishte për notën 10. Teuta vazhdon të jetë në garën për titullin kampion e për këtë arsye një meritë të madhe ka edhe Vila që kur është në një ditë të mirë nuk fal.
Elvi Berisha (Skënderbeu): Korçarët marrin një barazim me shumë vlera në luftën për mbijetesë duke ndalur në barazim 1-1 Vllazninë. Një nga lojtarët më të mirë në fushën e lojës së bashku me portierin Dajsinani ishte dhe mesfushori Elvi Berisha. I shpejt me depërtimet e tij dhe vë gjithmonë në panik mbrojtjen e Vllaznisë. Një lojtar që premton shumë për të ardhmen, por edhe që mund t’I sjelli të ardhura Skënderbeut.
Dejvi Bregu (Teuta): Është afruar për të bërë liderin dhe një gjë të tillë e tregon në ndeshje të mëdha. Vlonjati dhuroi një pasim “magjik” për Lorencon Vilën që e ktheu në gol e bëri që Teuta të dilte me 3 pikë nga transferta e “Selman Stermasit” ndaj Tiranës. Edhe pse nuk shënoi gol, Bregu bëri një paraqitje fantastike duke nxjerr shumë herë shokët e skuadrës përpara porte. Nga ndeshje në ndeshje po tregon rritje dhe duket se tashmë është përshtatur më së miri te Teuta.
Eraldo Çinari (Partizani): Njeriu I ndeshjeve të mëdha dhe golave me vlerë 3 pikë. Sulmuesi shkodran nuk zhgënjen as sot në sfidën ndaj Kukësit që u fitua me rezultatin 2-1 nga të kuqtë. Çinari shënoi golin e parë të ndeshjes me një veprim të bukur akrobatik duke e ndalur topin në fundin e rrjetës. Pas më shumë se 6 muajsh i pezulluar duket se është kthyer më i uritur se kurrë.
Antoni Beji (Bylis): Shënon një gol që mund t’i vlejë një sezon për Bylisin. Sulmuesi nigerian nuk fal përpara portës dhe i jep një fitore ballshiotëve ndaj një rivali direkt për mbijetesë. Antoni ishte gjithmonë një rrezik konstant për mbrojtjen e Apolonisë dhe te momenti i golit tregohet mjaft i zgjuar duke gjuajtur thjesht e duke mposhtur portierin Harizaj.
Trajner: Ilir Daja (Partizani): 3 pikë ndaj një rivali direkt, por edhe ngushtim diference në -4 ndaj Vllaznisë. Duke parë ndalesën e shkodranëve, Daja e dinte mjaft mirë që kjo ndeshje duhej fituar me çdo kusht. Skuadra nuk e zhgënjen dhe bind në fushë duke marrë kështu një fitore që I afron më shumë me kreun dhe vë në presion të madh Vllazninë. Në skuadër ka shumë alternativa dhe nga minuta e parë i beson Çinarit dhe Asanit, ndërsa në krahun e djathtë të mbrojtjes Malës. Nëse Partizani mori një fitore kaq të rëndësishme ndaj Kukësit, padyshim merita i takon edhe trajnerit Ilir Daja.
Loading ...
