Kategoria Superiore u rikthye të nisë pas dy pauzave të Botërorit dhe asaj të janarit dhe tashëm ka rifilluar me javë ne 16-të. Lojtarë që shkëlqyen dhe spikatën duke qenë ndër më të mirët në skuadrat e tyre. Neësport.al ka përzgjedhur formacionin e javës nga porta e deri në majën e sulmit.
Padyshim që një vend kryesor zë edhe trajneri, që këtë javë i “faturohet” Mirel Josës pas fitores me përmbysje ndaj Partizanit kryuesues.
FORMACIONI I JAVËS:
Mario Dajsinani (Laçi) – Pavarësisht humbjes 1-2 ndaj Tiranës, portieri kurbinasve ishte më i miri në fushë për ekipin e Mezanit. Nëse nuk do të ishte për pritjet e tij, ndeshja mund të merrte një rrjedhë tjetër me Tiranën që sulmonte vazhdimisht. Dajsinani vazhdon me paraqitje konstante dhe emri i tij është bërë shpeshherë pjesë e formacionit të javës
Erdenis Gurishta (Vllaznia) – Luan përsëri në qendër të mbrojtjes pasi aty ka nevojë ekipi i tij dhe kapiteni bën atë që një kapiten duhet të bëj. Gurishta ishte i pakalueshëm në fitoren përballë Partizanit, çdo top nisej nga ai. Një lider dhe pikë referimi për të rinjtë e ekipit, sidomos për Smajlin që i kishte “zënë” krahun e djathtë.
Stiven Janku (Bylis) – Qendërmbrojtësi i ballshiotëve ishte në një formë të shkëlqyer në barazimin pa gola ndaj Kukësit. U bë makthi i sulmuesve Daci e Barbosa duke fituar thuajse çdo duel. Paraqitja e mirë mund të kurorëzohej edhe me një gol në fund por fatkeqësisht për të, nuk ndodhi. Prej dy sezonesh është kthyer në lider të mbrojtes së Bylisit.
Nehar Sadiki (Erzeni) – Në mungesë të Gëzim Krasniqit, peshën e liderit e mban gjiganti nga Kumanova. Edhe pse në moshën 24-vjeçare, në fushë duekt sikur ka një jetë që luan. Është i pathyeshëm në lojën në ajër dhe rrezik konstant në goditjet standarte. Kështu erdhi edhe goli i barazimit, pikërisht nga ai, ku “fluturoi” mbi turmën e lojtarëve të Egnatias për të mposhtur më pas portierin Sherri,
Emiljano Musta (Egnatia) – Anësori i majtë është një motorr në krahun e tij. Mbrojtja e hekrut e Erzenit po ia bënte të vështirë punën sulmuesve të Egnatias dhe çuditërisht, rreziku më i madh vinte nga dy mbrojtësit e krahut, Fangaj e Musta, që iu afruan disa herë golit. Musta arriti të bëhej protagonist në këtë sfidë teksa fitoi një penallti që do të konvertohej në gol nga Jackson për të barazuar rezultatin.
Ardit Hila (Tirana) – Te kampionët në fuqi është një zëvëndësues por ndaj Laçit e nisi titullar. Shpërbleu shumë mirë besimin e trajnerit Shehi teksa kreu thuajse të gjitha detyrat, si në mbrojtje edhe në sulm. I kudondodhur në fushë, luan mirë me topin, gjen hapsira për shokët e ekipit dhe arrin të dhurojë një asist për Hasanin në golin e fitores.
Fjoart Jonuzi (Vllaznia) – Prezenca e tij në fushë është e pacënueshme të Vllaznia. Trajneri Mirel Josa e di që nga këmbët e tij filtrohet çdo top i shkodranëve. I hekurt në mbrojtje dhe rrezik konstant në aksionet sulmuese duke bërë që Vllaznia të dominojë dukshëm në mesfushë Partizanin. Paraqitja e tij do të shpërblehej edhe me një gol “silurë” që do të sillte barazimin e përkohshëm përpara golit të përmbysjes nga Çoba.
Florent Hasani (Tirana) – Pas ndeshjes deklaroi që Tirana nuk ka vetëm Xhixhën por është edhe ai aty. Kjo deklaratë që nuk thuhet në ajër pasi sulmuesi po e tregon me vepra në fushë. Golat e tij ndoshta nuk janë në sasinë e Xhixhës por sa herë që ai shënon Tirana del me tre pikë. Ndaj Laçit u desh një perlë e tij nga jashtë zone në fillimin e pjesës së dytë për të përmbysur rezultatin.
Jackson (Egnatia) – Këtë sezon ka një peshë të madhe mbi supe, ekipi e ka graduar si kapiten dhe braziliani mundohet të bëjë liderin. Ndaj Erzenit, e nisi ngadalë por në pjesën e dytë mori “flakë”. Shënoi golin e barazimit me penallti por topin e dërgoi edhe njëherë tjetër në rrjetë. Megjithatë, festa do të ndalej nga VAR që anulloi golin për faull në mesfushë.
Lorenco Vila (Teuta) – Nëse Teuta arrin të rrezikojë ndonjëherë, e bën me Lorenco Vilën. Ky sezon është me shumë vështirësi për durrsakët por sulmuesi tenton të bëjë maksimumin. Ndaj Kastriotit zhbllokoi sfidën ndërsa më pas asistoi edhe për golin e Oshafit që vulosi sfidën. Shkurt, protagonist absolut.
Aldrit Oshafi (Teuta) – Largimi i Rubin Hebaj ka lënë një boshllëk të madh te Teuta, trajneri Martini i besoi fanellën e titullarit Oshafit në qendër të sulmit ndaj Kastriotit dhe 22-vjeçari ia shpërbleu besimin duke shënuar golin e fitores. Edhe pse është 1.93 i gjatë, beratasi ka një shpejtësi që e bën të rrezikshëm për çdo mbrojtës. Sëbashku me Lorenco Vilën, ia bënë ditën të vështirë mbrojtësve të Kastriotit.
Trajner: Mirel Josa (Vllaznia) – Tekniku tiranas i dha shkollë futbolli homologut italian të Patizanit, Collela. Një ndeshje e përgatitur në detaje nga ekipi i Vllaznisë që u duk në çdo minutë dominuese karshi kryesuesve që luanin në shtëpi. Një gabim i vetëm që rezultoi me golin e të kuqve por më pas do të vinte dhe përmbysja e madhe. Nëse Colella gaboi me zëvëndësimet, Josa bëri të kundërtën, stoli i dha atij tre pikët me Çobën që shënoi në fund të takimit.
[caption id="attachment_676024" align="alignnone" width="390"]
Formacioni i javes se 16-te te Abissnet Superiore[/caption]
Lexo gjithashtu
