Baza materiale e Kombëtares ka ndërruar markë shpeshherë në vitet e fundit dhe nuk ka kaluar pa u vënë re nga të gjithë. Adidas, Puma, Nike, Umbro, Legea janë këto që mund të mbahen mend lehtë, pasi i kemi parë shpesh në kuadrin e 10 viteve të fundit.
Marka e fundit ishte Adidas, ku me të veshur, djemtë e Kombëtares arritën që të kualifikohesh në Europian, çka është historikë për Shqipërinë. Por, shumë shpejt “tre vijat” u ndërruan me Macron, e cila solli habi edhe për publikun, i cili nuk besonte se fanella kuqezi do të punohej më mirë sesa Adidas.
Mosmarrëveshjet mes FSHF-së dhe Adidas nisën për dizajnin e bluzës, që u bë dhe shkak për shkëputjen e marrëdhënieve. Në lojë hyn Macron, një kompani e vogël italiane, e cila mori përsipër që të vinte në jetë të gjithë planet e FSHF-së për fanellën e personalizuar në këtë Europian. Përfaqësimi ishte dinjitoz, ndërsa fanella e personalizuar u rendit ndër më të bukurat e këtij kompeticioni.
Por, fama që Macron mori gjatë përfaqësimit të Shqipërisë në Europian ishte e paparashikuar, pasi edhe shitjet nisën të rriteshin në numër rekord. Për Handelsblatt, Drejtori i Marketingut të Macron foli për Europianin dhe cilësinë e fanellave si dhe projektet e së ardhmes. “Kur arritëm akordin me Shqipërinë, ekipi ishte kualifikuar tashmë, por përfitimet ekonomike dhe morale që buruan prej turneut na kanë lumturuar. Kontrata jonë zgjat 6 vjet dhe mezi presim të vazhdojmë bashkëpunimin. Deri më tani ka qenë i shkëlqyer”, u shpreh fillimisht Z.Casolari.
“Është detyra e departamentit të marketingut sportiv për ta monitoruar nga afër tregun. E njohim çdo segment dhe jo vetëm në futboll: kur dhe kujt i skadon kontrata. Para se diçka të ndodhë, ne kontaktojmë klubet dhe federatat – ne i iniciojmë vetë negociatat. Kështu ndodhi dhe në rastin e Shqipërisë dhe ramë dakord”, sqaroi zyrtari i Macron, markë që tashmë po vishen dhe skuadrat e tjera të Superiores si; Kukësi, Tirana e Partizani.
