Flamurtari është kthyer në një kantier punimesh ditët e fundit, ndërsa sot do të zhvillojë ndeshjen e parë miqësore për këtë sezon kundër Korfuzit në shtetin fqinj. Lojtarët dhe stafi kuqezi janë zhvendosur në ishullin grek, ndërsa në Vlorë kanë mbetur shumë çështje për t'u zgjidhur.
Administratorit Sinan Idrizi po i "dridhet toka nën këmbë", pasi më 31 korrik e drejta e administrimit të Flamurtarit i përfundon, kështu që në rast se nuk rinovohet, atëherë nuk do të jetë çudi që Flamurtari të shpërbëhet dhe gjithë kjo që kemi parë deri sot të duket një tymnajë.
Përpos atyre që reklamohen më media, te Flamurtari kanë firmosur por ende asgjë nuk ka shkuar në vijë, ashtu siç duhet. Sinan Idrizi ka ardhur nga Turqia me mision, ndërsa i duhet që të kalojë dhe njëherë në duart e bashkisë së qytetit bregdetar, por edhe të Këshillit, i cili do të vendosë nëse do t'ia japë sërish të drejtën e administrimit, apo do t'ia kalojë dikujt tjetër ose ta mbajë për vete siç ka qenë disa vite më parë.
Trajneri Gugash Magani ka ndërtuar ekip cilësor, ndërsa ngjarjet që pritet të marrin zhvillime më të gjera në javën e ardhshme bëjnë që asgjë të mos jetë e sigurt në Vlorë. Të gjithë janë me shpresën tek administratori dhe te "kartoni jeshil" i këshilltarëve të bashkisë së Vlorës.
Lexo gjithashtu
