Federata e futbollit në Kosovë ka reaguar pas djegjes së flamurtari grek ditën e djeshme. Skuadra e Gjilanit luajti sfidën e turit të parë të Europa League ndaj skuadrës qipriote të Apoel. 90 minutat e ndeshjes u mbyllën në barazim 0-0, ndërsa në shtesa ishte Apoel që shënoi dy herë.
Disa tifozë të skuadrës së Gjilanit vendosën të digjnin flamurin grek dhe kjo sjell reagimin e Federatës së Kosovës që dënon ashpër këto gjeste. Greqia do të jetë gjithashtu kundështari i Kosovës në ndeshjet e Europa League dhe Federata ka kërkuar tifozët të dëshmojnë se Kosova është një vend mikpritës.
Postimi i Federatës së Kosovës:
Federata e Futbollit e Kosovës e dënon fuqishëm aktin e djegies së flamurit të Greqisë në sheshin e kryeqytetit nga disa individë të pandërgjegjshëm, e që thirren në përfaqësim të një grupi të tifozëve, pas ndeshjes së mbrëmshme Gjilani - Apoel. Grupi i tifozëve "Skifterat" deri tash nuk është shquar për akte të tilla apo për dhunë, andaj edhe individët që e kanë kryer këtë akt të turpshëm besojmë që nuk kanë lidhje me këtë grup të tifozëve.
Njëherësh, konsiderojmë se ky akt i shëmtuar nuk ka asgjë të përbashkët me kulturën dhe idealet e popullit tonë. Çdo sjellje e tillë është në kundërshtim me vlerat tona dhe ambicien për të qenë pjesë e familjes së shteteve demokratike evropiane.
Me këtë rast, kërkojmë nga organet e rendit që të vihen në kërkim të individëve që e kanë kryer këtë akt të shëmtuar, i cili e prish imazhin e futbollit dhe të shtetit tonë.
Kosova është shndërruar në storie të suksesit dhe shembull për të mirë duke iu falënderuar paraqitjeve të shkëlqyeshme të Kombëtares sonë, por edhe animit korrekt të tifozëve tanë "Dardanët" në çdo ndeshje e stadium, prandaj është e patolerueshme të lejojmë të na ndodhin akte të tilla si kjo e mbrëmshmja dhe aq më parë nga individë që veten e quajnë tifozë futbolli.
Pikërisht në fillim të muajit të ardhshëm Kosova do të ballafaqohet me Greqinë në kuadër të Ligës së Kombeve dhe si në çdo ndeshje tjetër, edhe këtë herë do të dëshmojmë se jemi vend i vlerave sublime dhe popull mikpritës.
Lexo gjithashtu
