Edon Zhegrova që luan tek Lille dhe Amir Rrahmani që aktivizohet tek Napoli në Serie A italiane ishin dy mungesat e Kosovës në ndeshjen që këta të fundit luajtën përballë Izraelit në stadiumin “Fadil Vokrri”. Të dy këta futbollistë janë komentuar shumë, madje edhe akuzuar. Akuzat kanë qenë të shumta deri në ‘mosrespektim’ të fanellës.
Sipas akuzuesve futbollistët kanë vënë në plan të parë klubet ku luajnë dhe jo Kosovën.
Por këtë përplasje me Federatën e Futbollit të Kosovës e konfirmon vetë Zhegrova. Ky i fundit thotë se i është bërë “presion”. Në rast se nuk do të bashkohej me ekipin e Kosovës në ndeshjen përballë Izraelit, Zhegrovës i është thënë se nuk do t’i duhej ekipit më për ndeshjet e tjera.
Por sulmuesi i Lille ka shpërthyer me anë të një postimi në profilin e tij në Instagram.
“U rrita në Prishtinë më ëndrrën se një ditë do të luaj për Kombëtaren time.
Edhe pse derisa e krijuam Kombëtaren e Kosovës, mua m’u ofruan shumë oferta, shumë joshje, të jem diku tjetër, por për mua ishte vetëm një ëndërr: të luaja për atdheun tim, për Kosovën.
Me muaj të tërë më kanë joshur të tjerët me lloj-Iloj oferte, ndërsa për Kosovën kam vendosur për 1 minutë bisedë me të ndjerin Fadil Vokrri. Sepse e kam dëgjuar zemrën.
Të dashur tifozë, ditët e fundit erdha me pikëpyetje të luaj apo të mos luaj nga njerëz brenda kombëtares, ata që vendosin për fatin e Kosovës në forma individuale dhe asnjëherë zyrtare.
Të them të vërtetën, shumë herë isha pengesë e disa personave në kombëtare dhe thashethemet ishin drejtuar kundrejt meje shpesh, por nuk kam folur asnjëherë, vetëm të mos e prish harmoninë e kombëtares, sepse kombëtarja është mbi të gjithë, mbi intrigat, thashethemet e njerëzve amatorë kundrejt meje.
Ndeshjen e fundit nuk pata mundësi të jem pjesë e Kosovës për arsye tashmë të njohura, pavarësisht dëshirës sime të madhe. Ua kam bërë të ditur që për ndeshjet tjera dua të jem aty të ndihmoj kombëtaren me vullnetin maksimal, por përgjigjja e tyre ishte: nëse nuk vjen ketë ndeshje, harroji edhe ndeshjet tjera, nuk po na duhesh.
E çuditshme, sepse jam në formën më të mirë dhe dua të kontribuoj dhe të sakrifikoj gjithçka për Kombëtaren time.
Njerëzit në kombëtare e dinë, që unë shpesh kam luajtur i lënduar dhe kam sakrifikuar edhe karrierën për fanellën e Kosovës. Ndaj Rumanisë, kam ardhur, kam luajtur “me një këmbë”, dhe asnjëherë nuk jam ankuar sepse këtë e bëj për nderin e shtetit dhe popullit dhe jo për njerëzit injorantë, që bëjnë kalkulime dhe nuk ia duan të mirën vendit!
Shumë njerëz dhe dashamirë të mi më shkruan dhe më pyetën prandaj desha të jap këtë sqarim.
Dhe asnjëherë nuk do të hesht ndaj padrejtësive. Unë kam qenë, jam dhe do të jem gjithmonë “Biri yt, Kosovë”, juaji, Edon Zhegrova”, shkruan sulmuesi i Kosovës dhe Lille në kampionatin francez.
Lexo gjithashtu
