Etrit Berisha, gardiani i portës kuqezi është shfaqur i motivuar për ndeshjen e së dielës kundër Rumanisë. I pyetur për mbylljen e dyerve të stadiumit nga ana UEFA-s ditën e sotme, ai foli:
“Ne dimë rreth kësaj dhe është për shkak të motit të keq. Jemi në formë optimale dhe jemi të përgatitur për ndeshjen e nesërme”.
Loriku një nga shtyllat e kombëtares, nuk dihet nëse do të jetë ditën e nesërme dhe Berisha ka një përgjigje për këtë.
“Mund të them që Loriku është shtylla e Kombëtares. Me siguri është diçka e madhe ta kemi në ekip. Me siguri për gjëra të tjera është trajneri që vendos”.
Skuadra duket e motivuar për ndeshjen e nesërme dhe këtë e konfirmon dhe siguria e portës tonë.
“Është gjë e mirë për ekipin. Për ne është ndeshje e madhe, në karrierën time ndoshta. Ne jemi më të motivuar dhe më të përgatitur se kurrë. Do të jetë e vështirë, sepse Rumania ka ekip të mirë. Kemi bërë dy ndeshje të mira, por jemi ndëshkuar fatkeqësisht. Ne e kemi përgatitur ndeshjen duke parë videot e tyre. Ata kanë ekip të mirë dhe luajnë në grup, por ne do të bëjmë të njëjtën për të bërë ndeshje të madhe nesër. Nëse nuk shënojmë, nuk e fitojmë ndeshjen. Nesër do të mbrohemi mirë dhe do të kërkojmë të shfrytëzojmë shanset tona. Në dy ndeshjet e fundit kemi bërë lojë të mirë ndaj Francës dhe Zvicrës, krijuam raste, por nuk shënuam. Ishin pak poshtë me motivimin. Gjithçka është harruar një ditë më pas, sepse duhet të përqendrohemi për ndeshjen e radhës. Kemi zgjedhje të shumta në të gjitha repartet. Lojtarët janë gati të japin frymën e fundit për të bërë të mundur kualifikimin”.
I pyetur nëse kishte frikë nga forma e mirë e portierit rumun, Berisha deklaroi:
“Unë e njoh Tatrushanon, kemi luajtur bashkë në Serie A. Ai luan për Fiorentinën dhe është portier i mirë. Por, ne do të luajmë si ekip për të shënuar gol. Do të provojmë shansin dhe të krijojmë rastin më të mirë për të bërë gol”, ka përfunduar gardiani i portës shqiptare.
