Xhuliano Skuka është shumë pranë largimit nga Partizani. Burime të besueshme pranë klubit të kuq bëjnë me dije për Newsport.al që sulmuesi dibran pritet të transferohet në Francë. Është klubi i Metz që është i gatshëm për të plotësuar kërkesat e klubit kryeqytetas, por edhe të lojtarit që këtë sezon po shkëlqen në Kategorinë Superiore.
Negociatat janë drejt fundit dhe nga sa mësohet, ka qenë ndërhyrja e Shkumbin Qorrmemetit i cili ka mundësuar këtë transferim të bujshëm. Një hap i rëndësishëm ky për Skukën që do të ketë mundësinë të tregojë vlerat e tij në kampionatin francez.
Kujtojmë që këtë edicion futbollistik ka shënuar 10 gola në 16 ndeshje që është aktivizuar. Vlera e 24 vjeçarit është 500 mijë euro sipas "Transfermarkt". Megjithatë te Partizani kanë kërkuar dyfishin për të lënë të lirë lojtarin. Performanca pozitive ka rënë në sytë e të huajve dhe tashmë Skuka pritet të bëjë hapin e madh në karrierë. /Newsport.al/
Lexo gjithashtu
