Mësohen detaje të reja nga largimi i bujshëm i Gugash Maganit nga stoli i Flamurtarit.
Burime të sigurta për newsport.al konfirmojnë faktin se trajneri peqinas ka hequr dorë nga 160 mijë euro duke ia falur në këtë mënyrë klubit vlonjat dhe konkretisht, Sinan Idrizit.
Kontrata që Magani firmosi 4 muaj më parë me klubin e Flamurtarit ishte 3-vjeçare, ndërsa shifra monetare që do të përfitonte brenda kësaj periudhe kohore ishte 180 mijë euro.
Por, sipas informacioneve të fundit që mëson newsport.al, trajneri 51-vjeçar ka kërkuar nga Sinan Idrizi vetëm 20 mijë euro, vlerë financiare që përkon me 4 muajt që ai punoi në ekipin vlonjat.
Në këtë mënyrë, Gugash Magani ka hequr dorë nga 160 mijë euro të tjera, një shumë marramendëse, të cilën trajneri peqinas mund ta kishte bërë të tijën fare mirë në rast se do t’i drejtohej gjyqit.
Por, Magani zgjodhi ndarjen me mirëkuptim me presidentin e Flamurtarit, Sinan Idrizin, duke u larguar nga skuadra që drejtoi në 4 muajt e fundit me kërkesën për të marrë vetëm 20 mijë euro, të cilat i takojnë pas punës që ka kryer nga korriku deri ditën e djeshme kur edhe vendosi të shpallte “divorcin” nga Flamurtari.
