Ish-mbrojtësi i Tiranës, Albi Doka ka komentuar ndeshjen derbi mes Tiranës dhe Partizanit që do të luhet të premte në 18:00 në “Air Albania Stadium”. Për lojtarin që ka dalë nga Akademia e bardhebluve nuk ka dyshime se cili do të trimfojë në këtë sfidë, teksa sipas tij ndeshjen e vendos Batha ose Hoxhallari.
24 vjeçari, për Newsport.al tregon dashurinë e madhe që ka për Tiranën, duke theksuar se e ndjek futbollin në Shqipëri vetëm për “Tironën e Modhe”. I larguar në merkaton e verës drejt HNK Gorica, Doka e sheh Kroacinë si tranpolinë për një kampionat më të fortë.
Titullar këtë fillim sezoni, Doka ia ka dalë që në Kroaci të shënojë një gol dhe të japë një asist, teksa ka qenë pjesë e Kombëtares kuqezi në ndeshjet e fundit, duke fituar besimin e trajnerit Edy Reja që i ka dhënë një vend në formacion.
– Albi, një gol dhe një assist këtë sezon në Kroaci. Si po shkon aventura juaj me HNK Gorica?
Po e kam nisur mirë sezonin dhe shpresoj të vazhdoj kështu te Gorica.
– Keni fituar besimin e trajnerit të Kombëtares, çfarë do të thotë për ju që vishni fanellën kuqezi?
Është një nder për mua që të vesh fanellën e Kombëtares shqiptare të futbollit, emocion i madh.
– Keni pak kohë që jeni larguar nga futbolli shqiptar, e keni ndjekur Superligën?
E kam ndjekur Superligën shqiptare, sepse sigurisht shoh ekipin tim të zemrës që është Tirana.
– Të premte luhet ndeshja me Partizanin, çfarë është derbi për lojtarët bardheblu dhe si përjetohet kjo ndeshje ?
Derbi është një ndeshje që s’ka nevojë për motivim. Të gjithë lojtarët e kuptojnë rëndësinë e kësaj sfide dhe në fund Tirana do të dalë fitimtare.
– Meqë jemi te derbi, si është të luash pa tifozë në këto ndeshje sepse ju e provuat edicionin që shkoi?
Derbi pa tifozë nuk ka kuptim, sigurisht do jetë ndryshe pa ta.
– Çfarë janë tifozët për skuadrën e Tiranës, ndikon mungesa?
Siç e kam thënë edhe më përpara, tifozët e Tiranës janë më të mirët dhe pa ata nuk ka kuptim ndeshja.
– Me gjendjen aktuale të skuadrave, cili duket favorit për mendimin tuaj?
Edhe me formën aktuale sërish favorite për mendimin tim është “Tirona Modhe”.
– Cili lojtar do të jetë deçiziv në derbi?
Ndeshjen do ta vendosë Batha ose Hoxhallari. Mendoj se njëri nga të dy do të jetë deçiziv.
– Titullar me Gorican, ku e sheh Doka të ardhmen?
Jam titullar te Gorica dhe më mjafton të ruaj këtë formë në këto nivele. Nëse vazhdoj kështu shpresoj për më shumë. Dua të shkoj më lart në karrierë dhe pse jo shumë shpejt një transfertë tjetër. /Stavro Anesti Dhimitri/
Loading ...
