Ekskluzive/ Tifozat Kuq e Zi rrëfejnë të pathënat e Europianit

Tifozat Kuq e Zi nuk morën pjesë në tribunat e stadiumeve të Francës, sepse FSHF nuk iu doli në krah që ata të ishin të grupuar edhe në këtë eveniment. Këta tifozë kanë mbështetur kuqezinjtë kudo në mbarë botën, ndërsa në evenimentin më të madh të futbollit Europian, ata nuk ishin aty. Arsyeja kryesore është se FSHF organizoi një tjetër grup tifozësh, duke bërë përjashtimin e tyre në njëfarë mënyre. Ndërsa kur ka afro 10 ditë që Shqipëria nuk është më në Europian, ata pranojnë që të flasin për herë të parë pse nuk ishin prezentë dhe a e kanë vënë në pikëpyetje ekzistencën e tyre në të ardhmen.

-Tifozët kuqezi u panë pak ose fare gjatë Europianit. Pse?
Besoj se jeni në dijeni që FSHF përjashtoi jo vetëm TKZ- në, por çdo tifogrup shqiptar duke mos dhënë bileta në grup për tifogrupet shqiptare. Shtuar kësaj edhe UEFA nuk ka përparësi të promovojë tifogrupet nëpër evente të tilla. Por, pavarësisht kësaj, ne kemi qënë aty duke “zaptuar” një pjesë të stadiumit dhe që prej aty të ndikonim me thirrje e këngë për kombëtaren gjithë pjesën tjetër të tifozerisë.

-Jeni ndjerë të përjashtuar nga Federata gjatë kësaj periudhe?
Sigurisht që po, pasi ajo që thamë më lart e tregon këtë sepse nëse do të kishim një pjesën tonë të caktuar në stadium edhe do të ndikonim më shumë atmosferën gjatë ndeshjeve.

-A ka rrezik për shpërbërje?
Ka shumë njerëz që nuk i duan TKZ në tribuna dhe e bëjnë shpesh me dëshirë këtë pyetje. Por, prej 13 vitesh ia kemi dalë që pas situatave të vështira ne të dalim edhe më të fortë se më parë. Së fundmi TKZ është pjesë e FSE (Mbështetësit Europian të Tifozëve) të njohur edhe nga UEFA njëkohësisht të akreditur dhe pjesë e organizimit dhe mbarëvajtjes për aktivitetet e tifozerisë shqiptare.

-Jo vetëm në Francë, por dhe nëpër sheshe kanë munguar Tifozët Kuq e Zi. Pse?
Me rrethanat e krijuara dhe të shpjeguara më sipër sërish kemi qenë në një numër të lartë dhe kemi qenë aktiv gjatë të gjitha ndeshjeve të Kombëtares edhe pse ndoshta larg TV.

-Një grup “Ilirjan Elitë” u promovua para Europianit. Është thënë se janë ish-antarët tuaj. Cila është e vërteta?
Kombëtarja nuk është pronë e TKZ dhe gjithmonë në stadium ka pasur edhe të tjera tifogrupe në mbështetje të Kombëtares. Ndaj nuk e shohim lajm krijimin e këtij tifogrupit të ri. TKZ funksionon në bazë të disa rregullave, parimeve e qëndrimeve dhe nuk i qëndron atyre lirisht mund të largohen nga grupi.

-Si do të vijoj aktiviteti i Tifozave Kuq e Zi?
Ashtu si përherë në mbështetje të Kombëtares dhe sportistëve shqiptarë që nderojnë dhe lartësojnë flamurin kombëtar.

-Si funksionin aktualisht. Kush drejton?
Është një funksionim i brendshëm që nis me anëtarët që janë pjesë e përfaqësive të qyteteve të shpërndara në të gjitha trojet dhe diasporë.

-Një mesazh për ti dhënë Kombëtares?
Të na bëjë krenar kurdo dhe kudo luajnë dhe të mbajnë lart flamurin kombëtar.

-Një mesazh për presidentin Duka?
A mendoni se ka ardhur  koha për ti respektuar tifozat shqiptar siç i ka respektuar e gjithë bota? Kemi shumë shembuj gjatë kualifikueseve në këtë periudhë dhe shembulli i Euro 2016 është për tu marrë edhe nga FSHF në sjelljen ndaj tifozerisë shqiptare.

-Një mesazh për kapitenin Cana?
E falenderojmë për të gjithën sa ka dhënë për këtë fanellë dhe sigurisht do të na mungojë në fushë një kapiten si ai.

-Një mesazh për të gjithë tifozët kuqezi?
Kur fiton kjo Kombëtare është e të gjithëve ndërsa kur humbet është vetëm e jona ndaj të jemi pranë këtyre djemve në çdo moment.