Partizani, Kukësi dhe Teuta janë ekipet pjesëmarrëse në Europa League për këtë sezon nga Shqipëria. Të tre këto skuadra u është dashur që të dorëzojnë listat zyrtare për takimet e raundit të parë, ndërsa një gjë e tillë është bërë nga të tre ekipet, por janë vënë re ndryshimet në to. Pikërisht Partizani është skuadra që i habit të gjithë, pasi në listë ka disa ndryshime, të cilat janë ndryshe nga ato që i janë “shitur” tifozëve të kuq dhe publikut për dy takimet që do të zhvillohen kundër Slovan Bratislavës.
Në listë ndryshimet shihen që në mbrojtje, mungon Ditmar Bicaj dhe është përfshirë Arbnor Fejzullahu. Të dy lojtarët nuk ishin pjesë e përgatitjeve në Itali, ndërsa për lezhjanin Bicaj u pohua se ai është pjesë e klubit, por që është lënë pushim. Për Fejzullahun pati një sërë përplasjesh, pasi donte të largohej te Skënderbeu, ndërsa sot është përfshirë në listën zyrtare të ndeshjes që është dorëzuar në UEFA.
Trajneri – Te Partizani kanë publikuar italianin Adolfo Sormani si kreun e pankinës, por në UEFA është vendosur elbasanasi Klevis Dalipi, i cili është zëvendëstrajneri i skuadrës së kuqe. Pra, tekniku italian do ta ndjekë këtë sfidë nga tribuna, pasi nuk do t’i lejohet që të drejtojë ekipin në fushë.
Sulmuesi – Skandali më i madh lidhet me “bomberin” e skuadrës, Xhevahir Sukajn. Ky i fundit ka nënshkruar me të kuqtë për Europën, por që në takimin që iu duhej më shumë që të kalonin grupin, ai do të mungojë. Shkodrani nuk do të jetë në ndeshjet kundër Slovan Bratislavës, ndërsa nuk është i regjistruar në listën zyrtare.
Kështu, Partizani po i zhgënjen të gjithë dhe gjasat janë që ndaj një kundërshtari me potencial të tillë, të mos luash me sulmuesin kryesor që ke në skuadër, do të thotë të rrezikosh shumë dhe të kesh një këmbë jashtë këtij kompeticioni ende pa e nisur atë.
