Ekskluzive/ Rrëfehet nënkampionia e Europës, nga kushtet e mjerueshme tek incidenti me limuzinën në aeroport

                                             Luiza Gega gjatë stërvitjes

Luiza Gega, vajza dibrane, që nderoi Shqipërinë duke dalë nënkampione e Europës në atletikë, në një prononcim për newsport.al ka rrëfyer emocionet e asaj gare, kujt ia dedikon këtë sukses të madh, dhe tregon punën e saj disavjeçare për të shkuar drejt këtij triumfi. Më tej 27-vjeçarja ka sqaruar edhe situatën e limuzinës, ku sipas saj ishte thjesht dëshira e saj për të zbritur, pasi disa familjarë kishin dalë për ta takuar. Një titull i rëndësishëm për atleten tonë, ku edhe një herë emri i Shqipërisë mori jehonë ndërkombëtare, por që shteti nuk vuri fare “ujin në zjarr”, për të bërë një pritje sado modeste për nënkampionen e Europës, e jo më për ta shpërblyer për këtë arritje historike.

– Çfarë ndjesie përjetove kur arrite në finish?
Ishte emocion shumë i madh ku mezi prisja të mbaroja 400m e fundit që më kishin mbetur dhe të përjetoja emocionin e fundit të finishit.

– Cili ka qenë urimi më i bukur që ke marrë pas medaljes?

Urimet kanë qenë të shumta sidomos nga njerëz të afërt, nga njerëz që u ndjenë krenarë për arritjen time, urime pa fund në rrjetet sociale. Për mua janë të gjithë të veçanta këto urime.

– Kujt ja dedikon këtë sukses?
Sigurisht trajneri është kontributi kryesor për këtë sukses, ka qenë gjithe këto vite që unë stërvitem, ku sportisti dhe trajneri i përjetojnë bashkë, sigurisht gjithë arritjet pasi dhe puna është e përbashkët.

          Kur Luiza stërvitej në Qemal Stafa

– Na trego pak sa punë të është dashur për të ardhur deri këtu?
Është një stërvitje shumë vjeçare, në fakt u bënë vite që kam rezultate shumë të mira në arenën ndërkombëtare, por që medaljen në të tillë aktivitet se kisha provuar.
– Ku stërvitesh? Cilat janë kushtet?
Aktualisht stërvitem në Korçë, nuk është vendi më i mirë për tu stërvitur, por se dhe mundësitë janë të pamjaftueshme për të shkuar jashtë.

– Çfarë të mungon ty dhe atletikës në Shqipëri?
Për momentin në fakt mungojnë shumë gjëra, aktualisht siç e dini në Tiranë është e pamundur të stërvitesh pasi na u prish dhe pista e vetme që kishim. Është bërë pista në Elbasan, por e kemi të pa mundur që të shkojmë shpesh nga Tirana në Elbasan pasi është vërtetë lodhje.

– Mendon se meritoje një pritje shumë më të ngrohte se ajo që të rezervuan mbrëmë?
Në fakt prisja për një pritje më të ngrohtë për sa i përket institucioneve, por për sa i përket pjesës tjetër u gëzova shumë nga gjithë ata njerëz që kishin ardhur për të më përkrahur dhe pse në orë të vona.

– E ke menduar për ndonjë moment mundësinë për të vrapuar për një tjetër flamur?

Për flamur tjetër?! Çdo sportist ndihet krenar kur ai, atë gjë të mirë që bën, atë sukses që arriti t’i shërbejë dhe vendit të tij. Nuk ka gjë më krenare dhe gëzim më të madh se sa të përfaqësosh vendin tënd. E kam menduar, por prapë kthej mendje herë pas here që gjërat do të bëhen më mirë dhe do të kem mbështetjen e duhur.
– Çfarë premton për lojrat olimpike?
Olimpiada sigurisht është aktiviteti më i vështirë për të gjitha sportet, sigurisht pretendimi im kryesorë do jetë finalja e Olimpiadës, pastaj sigurisht në finalë të gjithë do të japin maksimumin.

– Është përhapur lajmi që mbrëmë të kanë zbritur nga limuzina, është e vërtetë?
Jo në fakt zbrita vetë pasi kishin dalë familjarë duke më pritur, kjo ishte arsyeja e vetme.