Ekskluzive/ Prishet akordi, lojtari i Bylisit kthehet në Shqipëri

Bëhet fjalë pikërisht për sulmuesin e talentuar të Bylisit, Ardit Hoxhaj, i cili ishte në provë te skuadra greke e Pas Janinës. Pas provës së tij stafi teknik kishte dhënë ok-në që lojtari shqiptar të bëhej pjesë e tyre. Por jo gjithçka ka shkuar ashtu si duhej. Mësohet se drejtuesit e Bylisit kanë kërkuar të paguhet për kartonin e sulmuesit, duke vendosur edhe shumën prej 250 mijë eurosh për vlerën e tij. Mirëpo drejtuesit e Pas Janinës nuk kanë rënë dakord me këtë shumë, pasi ata kanë ofruar vetëm 20 mijë euro. Gjithashtu ata i kanë propozuar presidentit të Bylisit që sido që të shkojnë punët me sulmuesin, 50% vlerës së kartonit të tij, do të jetë pronë e klubit Ballshiot. Një gjë e tillë nuk është pranuar nga presidenti i Bylisit, duke bërë në këtë mënyrë që të dështojë kalimi i Ardit Hoxhajt te Pas Janina, skuadra e shqiptarit tjetër Andi Lila. 24-vjeçari do të kthehet ditën e sotme në atdhe.