Ergi Çela ndodhet sot në Itali. Ashtu siç kishte njoftuar Newsport.al ditë më parë, qendërmbrojtësi i Teutës ndodhet sot në ambientet e klubit të Veronës, me të cilët është arritur akordi që 14-vjeçari të veshë fanelën e italianëve. Në vendin tonë, Çela ishte pjesë e skuadrës së Teutës U-15, ekip me të cilin shkëlqeu. Newsport.al ka siguruar fotot e shtatlartit i cili është shfaqur i lumtur për këtë aventurë të re në karrierën e tij.
Fillimisht ai do të qëndrojë për 10 ditë e më pas do të rikthehet sërish për të mbyllur këtë sezon futbollistik. Duke qenë se 14 vjeçari ka lindur në Itali, pasaporta italiane e favorizon atë për t'u bërë pjesë e ekipit të Veronës. Pas muajit qershor ai do të udhëtojë sërish drejt shtetit fqinj për një turne te moshat dhe më pas do të kthehet disa ditë në Shqipëri, për t'u zhvendosur më tej përfundimisht në Itali, ku normalisht do të nisë edhe studimet.
Në klubin e Veronës e shohin si një lojtar të së ardhmes. Personaliteti i tij në repartin e qendrës së mbrojtjes ka rënë në sytë e italianëve. Përdor mirë të dy këmbët, dhe pse në moshë të vogël, ka një inteligjencë të jashtëzakonshme në prapavijë. Pritet të shihet se si do të jetë e ardhmja e djaloshit që ka lindur në Alzano në Itali, por është pjesë e moshave të Teutës në vendin tonë.
Lexo gjithashtu
