Teuta barazoi 2-2 në ndeshjen e djeshme të luajtur përballë Egnatias. Ekipi i drejtuar nga Edi Martini nuk ia doli të merrte 3 pikët edhe pse kaloi në avantazh në minutën e 95-të sfidës. Në sekondat e fundit të ndeshjes, ishte skuadra rrogozhinase që gjeti golin e barazimit duke i "rrëmbyer" triumfin "Djemve të Detit". Pas këtij barazimi, Teuta renditet në vendin e fundit të tabelës së klasifikimit me vetëm 15 pikë të grumbulluara.
Në lidhje me këtë takim, kapiteni i Teutës, Ledio Beqja ka dhënë një prononcim ekskluziv për “Newsport.al”. Beqja shprehet se loja e mbrëmshme foli e gjitha për durrsakët, por e keqja e vetme ishte fundi i takimit. Ai flet për objektivat e Teutës, teksa shpreson që ekipi të dalë nga kjo situatë.
"Loja mbrëmë ishte shumë e mirë për ekipin tonë. Ne ishim ata që kontrolluam ndeshjen. E keqja e këtij takimi ishte vetëm fundi i tij, pasi aty gabuam.
Presioni i pikëve është normale që të ndihet. Por kam besimin se do të marrim 6 pikë në dy ndeshjet e fundit që kanë ngelur. Objektivi i Teutës është ndeshja e radhës, pasi është herët për të folur për vendin e katërt. Së pari duhet të dalim nga kjo situatë e keqe.
Sepse unë dhe ekipi nuk e meritojmë këtë situatë që jemi tani. Kam shumë besim se dalim nga ai vend (fundi i tabelës së rënditjes) dhe do ecim përpara. Kam shumë besim tek shokët e mi që do ia dalim", është shprehur Ledio Beqja.
Lexo gjithashtu
