Futbolli shqiptar do jetë pushim deri në gjysmën e muajit dhjetor. Kjo për shkak të zhvillimit të kupës së Botës në Katar. Dhe loja në mbarë Europën do qëndrojë pezull. Por ekipet tona po bëjnë përgatitjet e duhura për të qëndruar në formë në kthimin e Superiores. Megjithatë një vëmendje qëndron edhe tek merkato e futbollistëve.
Muaji janar nuk është edhe aq shumë larg dhe me patjetër skuadrat e elitës do përpiqen të përforcohen me elementë cilësorë. Një prej atyre që mund të ketë një rikthim në kampionatin tonë është edhe Erald Çinari. Burime për Newsport.al mësojnë se mëngjërashi tashmë ndodhet në Shqipëri dhe vetë nëpërmjet një story në Instagram, Çinari ka konfirmuar se është në Shkodër. Në një moment ku liga e dytë e Turqisë, ku shkodrani është pjesë e Samsunspor e vijon aktivitetin.
Kjo tregon për 26-vjeçarin që me siguri ai nuk do e vijojë pjesën e dytë të sezonit tek ekipi turk. Besohet se ish-futbollisti i Vllaznisë dhe Partizanit do gjejë gjuhën e përbashkët për të shkëputur marrëdhëniet me klubin nga Samsun. E në Superligën tonë nuk mungojnë admiruesit për Çinarin. Duke nisur që nga Partizani, ekip ku ai u shndërrua në një prej lojtarëve më të mirë të Superiores.
Të kuqtë bënë tentativa edhe në merkaton e shkuar për ta rikthyer në skuadër, por pa sukses. Por ndoshta kësaj rradhe do e kenë më të lehtë për të arritur tek ish-kampioni i tyre. Po gjithashtu edhe Vllaznia mund të ketë një interes për lojtarin që e zhvilloi dhe e konfirmoi në futbollin tonë. Megjithatë ndoshta duhet të presim në janar për një lëvizje konkrete, por Çinari duket se do jetë një objektiv interesant në merkato për ekipet e Superiores.
Kujtojmë që mëngjërashi gjatë kohës që ka qenë te Partizani ka shkëlqyer me fanelën e kuqe duke arritur të shënojë pothuajse në çdo derbi. Ndaj pas largimit nga kryeqytetasit, u cilësua si “makthi” i Tiranës. /Newsport.al/
Loading ...
