Kombëtarja shqiptare do të luajë kudër Republikës Çeke të enjten e 12 tetorit në stadiumin “Air Albania”. Një ndeshje mjaft e rëndësishme e cila mund të quhet “finale” pasi varet shumëçka nga kualifikimi i kuqezinjve në Euro 2024, kompeticion që do të zhvillohet në Gjermani verën e ardhshme.
Në prag të kësaj sfide, ekskluzivisht për “Newsport.al” ka folur Altin Lala, ish-lojtari i Kombëtares kuqezi i cili ka qenë gjithashtu kapiten në 23 ndeshje. 47-vjeçari krahason kohën kur ka luajtur ai vetë me lojtarët e sotëm, teksa nuk i kursen elozhet për Kristjan Asllanin.
- Karriera juaj ka qenë e pasur duke luajtur në klube të nivelit të lartë në futbollin gjerman, por jo të gjithë e kanë arritur diçka të tillë në kohën tuaj. Mendoni se lojtarët aktual të Kombëtares janë më të favorizuar, pasi ditët e sotme është më e lehtë të transferohesh jashtë?
“Koha jonë ka qenë më e vështirë. I gjithë brezi im ka pasur faktikisht fat që u hapën kufijtë dhe u ndryshua sistemi. Edhe para nesh ka pasur shumë lojtarë të mirë, kemi patur Kombëtare të mirë që kemi luajtur dhe me Belgjikën. Ka qenë ai brez si Demollari me shokë, por ata kanë pasur fatin e keq se kanë luajtur një fazë tjetër. Kurse neve na u hapën kufinjtë dhe patëm dhe ne rezultate, nga ish-shkolla e diktaturës dhe disa lojtarë nga ne arritën të luanim në Bundesligë dhe Serie A. Ka qenë më e vështirë faktikisht, por vështirësitë të bëjnë më të fort që të jesh më i përgatitur. Por tashmë po të shohim Bundesligën 10 vitet e fundit, asnjë lojtar nuk ka arritur të transferohet aty. Po flas për lojtarë nga Shqipëria, pastaj ata që kanë lindur jashtë është punë tjetër. Armando Broja luan në Premier League, por është diçka ndryshe. Aty ka ende për të përmirësuar. Edhe pse janë bërë vitet e fundit transferime me shifra të larta për Superligën shqiptare. Kjo do të jet për të ardhmen që të rregullohet në ligën shqiptare që të bëhet më kompetitive dhe shpresoj që të dalin sa më shumë lojtarë nga Shqipëria që ta shkojnë jashtë dhe të jenë gati dhe për Kombëtaren pastaj.”
- A e shihni Sylvinhon në listën e 3 trajnerëve më të mirë që Kombëtarja ka pasur ndonjëherë?
“Patjetër që Sylvinho hyn tek trajnerët më të mirë pasi deri tani ka bërë mirë. Shpresoj që të arrijë dhe kampionatin europian dhe padyshim suksesi të jet gjithmonë i drejt dhe me këtë kohë suksesi që ka patur dhe grupi që ka krijuar me disiplinën dhe mënyrën e përgatitjes së lojës është padyshim në listën e 3 trajnerëve më të mirë. Por mos ta marrim mësysh ishalla të kalojë këto ndeshje dhe të kualifikohemi (qesh), por stafi është i gjithi i mirë.”
- Cili mendoni se është lojtari “kyç” i Shqipërisë?
Lojtarë kyç janë disa, por do të veçoja Gjimshitin që i jep siguri skuadrës, Berisha me shumë eksperiencë, po ashtu Asllani nga këto lojtarët e rinj që për mua është i pazëvendësueshëm. I japin ekipit shumë siguri, por ka dhe lojtarë të tjerë cilësor si Broja. Të gjithë janë të rëndësishëm, por këto do të veçoja.”
- Ju keni luajtur 23 ndeshje si kapiten i kuqezinjve. Kush e meriton më shumë të jetë kapiten i Kombëtares aktualisht?
“Berisha ka shumë ndeshje...Në kohën time ka qenë kështu, kush kishte më shumë ndeshje ose më i vjetri ishte kapiteni. Herën e fundit trajneri ia dha shiritin Gjimshitit. Është një djal fantastik, pozitiv dhe shumë i rëndësishëm për skuadrën. Por nuk është shumë e rëndësishme, e kam thënë gjithmonë që shiriti është vetëm një shenjë respekti. E merr ai që ka më shumë eksperiencë dhe përgjegjësi, por në fund të ditës dhe Asllani që merr përgjegjësi, është njëfarë kapiteni pa shirit. Kjo për mua është shumë më kryesore sesa shiriti i kapitenit.”
- Jemi shumë pranë ripërsëritjes së kualifikimit në një Europian. Mendoni se punë më të mirë ka bërë De Biasi në 2016 apo Sylvinho?
“Janë dy skuadra të ndryshme, janë vetëm disa lojtarë nga 2016. De Biasi ka vendin e tij pasi ishte hera e parë që Shqipëria kualifikohej. Po të përsëritej do të ishte diçka fantastike, por janë dy trajnerë të ndryshëm. Por thelbi është i njejtë pasi kanë kërkuar të dy shumë disiplinë.
- Kemi në Kombëtare sulmues të talentuar që kohët e fundit kanë gjetur shpesh dhe rrugën e rrjetës. Cili është i preferuar juaj dhe që mendoni se mund të jetë lideri i sulmit në ndeshjen ndaj Çekisë?
“Kjo temë është pak sensitive. Trajneri ka bërë gjithmonë zgjedhjet e duhura. Asanin në krahun e djathtë e ka patur në formë të jashtëzakonshme. Rikthehet dhe Broja, është Uzuni, Muja që janë në formë të mirë. Do të thotë që trajneri ka mundësi zgjedhje të mira për të bërë. Trajneri do ta vendosë, shpresoj që të bëjë zgjedhjen e duhur. Ky është një problem luksoz.”
- Ju si një ish-mesfushor, a mendoni se Ylber Ramadani është më i miri aktualisht në ato rol në ekipin tonë Kombëtar?
“Ramadani ka patur zhvillim në karrierën e tij, ka shkuar dhe në Serie A. Aty nuk mund të veçoj asnjëherë. Shoh dhe Asllanin pasi është shumë i rëndësishëm. Ndeshjen me Poloninë mendoj se ishtë një ndër pikat kyçe me pasimet e tij. Unë nuk do të veçoj aty asnjë, por siç e thashë qetësia e Asllanit ka koefidencë. Këta janë lojtarë që e rregullojnë skuadrën dhe i japin më tepër siguri. Ramadani ka meritat e tij, ka bërë shumë mirë dhe shpresoj që të bëjë mirë dhe këtë ndeshje.
- Si mendoni se do të jetë rezultati i ndeshjes?
“Nëqoftëse ne marrim rezultat pozitiv do ishte shumë mirë. Një barazim ose fitore do të ishte hap shumë i rëndësishëm. Me një hap do të ishim në Gjermani. Është ndeshje për tu zhvilluar. Tifozët ëndërrojnë, është normale, por unë e shoh shumë delikate dhe sensitive si ndeshje. Edhe nga ana e Çekisë është e tillë, pasi nëse humbin ndaj nesh kanë ndeshje direkte me Poloninë dhe kanë problemet e tyre më pas. As për ata nuk është e lehtë.
- A do të jeni prezent në shkallët e stadiumit për ta mbështetur nga afër Kombëtaren në këtë ndeshje të rëndësishme?
“Them se po...do e gjej një biletë (qesh)...e kam një biletë, bëj shaka.”
- Një mesazh për Kombëtaren dhe tifozët në prag të sfidës?
“Kombëtarja s’ka nevojë pasi është trajneri me këmbë në tokë dhe di ta motivojë skuadrën në maksimum. Përsa i përket tifozëve, si këto ndeshje që kanë kaluar atmosfera ka qenë fantastike. Ky edicion është “top” nuk ka munguar asnjëherë mbështetja. Të vazhdojnë mbështetjen edhe kur ekipi nuk është në momente të mira. Kjo është ndeshja më kyçe e këtij edicioni. Tifozët janë lojtari i 12-të dhe këtë ndeshje shpresoj t’i mbështesin sa më mirë.”
/Nikoll Andrea Rajta/
Lexo gjithashtu
