Gjatë dy viteve të fundit ka pasur shumë largime nga Flamurtari, midis të cilëve edhe futbollistë me peshë vlonjatë. Më pas janë rikthyer, siç ishte rasti i Hair Zeqirit, i cili u kthye një vit më parë, pas një sezoni te Kukësi. Në këtë situatë është aktualisht edhe ish-kapiteni i vlonjatëve, Franc Veliu, i cili këtë javë pritet të zyrtarizohet si lojtar i Flamurtarit. Drejtuesit janë dakord, por ka një problem. Veliu ka pasur përplasje dhe polemika në distancë me kapitenin aktual, Bruno Telushin, por edhe me tifozët vlonjatë.
PAJTIMI - Për të sheshuar gjithçka në këtë histori, drejtuesit e Flamurtarit kanë menduar që këto ditë, ndoshta që sot, të organizojnë një takim apo një kafe, ku të jenë të pranishëm si Veliu, ashtu edhe Teulshi. Qëllimi është pajtimi i tyre, sepse sezonin e ri duhet të luftojnë për të njëjtin objektiv dhe ekipi duhet të jetë sa më i bashkuar. Nuk është saktësuar ende se cili do të jetë "pajtuesi i gjaqeve", trajneri Gugash Magani apo administratori Sinan Idrizi. E rëndësishme është që është marrë iniciativa për sheshimin e mosmarrëveshjeve, sepse, në fund të fundit, Flamurtarin do ta nderojnë vlonjatët. Detajet për takimin, ku mund të jetë edhe ndonjë tjetër titullar i skuadrës kuqezi, gjithmonë vlonjat, do të mësohen pasi ai të jetë zhvilluar.
"FLOTA KUQEZI" - Para dhe pas largimit nga Flamurtari, Veliu ka pasur përplasje edhe me grupimin kryesor të tifozëve vlonjatë, "Flota Kuqezi". Mbetet për t'u parë se cila do të jetë sjellja e këtyre të fundit për rikthimin e mbrojtësit, por gjasat janë që edhe me ta të ketë një zbutje të marrëdhënieve, ngaqë është fjala për një djalë Vlore.
Lexo gjithashtu
