Arinaldo Rrapaj do të largohet sot nga Partizani. Burime të besueshme pranë klubit të kuq bëjnë me dije për “Newsport.al” që mesfushori do të transferohet në Bullgari.
Drejtuesit kryeqytetas kanë arritur marrëveshjen me Ludogorets për transferimin e vlonjatit, ku sigurisht do të mbushin ndjeshëm arkën. Shifrat e shitjes së futbollistit s’bëhen ende të ditura, ndërsa sot Rrapaj do të përshëndetet me shokët e skuadrës për t’u nisur menjëherë drejt Bullgarisë.
Një lajm i papritur ky për stafin teknik te të kuqve që tashmë duhet të gjejnë zëvendësuesin e tij. Rrapaj ishte titullar fiks në formacionin e Partizanit, ku vit pas viti pati një progres të jashtëzakonshëm. 21-vjeçari bën këtë hap të rëndësishëm në karrierën e tij. Ai largohet nga kryeqyteti me 50 ndeshje të luajtura duke shënuar edhe 7 gola me fanelën e Partizanit.
Mesfushori është gjetje 100 përqind e Ilir Dajës që prej periudhës kur drejtonte Flamurtarin e Vlorës. Pikërisht te kuqezinjtë, Daja e mori nga moshat duke i dhënë hapësira në ekipin e parë. Pas largimit nga Flamurtari e mori me vete te Skënderbeu. Më tej detyroi drejtuesit e Partizanit të paguanin për kartonin e tij duke e transferuar nga korçarët në kryeqytet. /Retin TOKA/
