Futbolli amator në Shqipëri është mjaft i përhapur prej disa vitesh tashmë. Jo të gjithë ia dalin të bëhen profesionistë për arsye nga më të ndryshmet, ndaj kalçetot, siç i njohim ndryshe, janë ato ‘dritare ëndrrash’ ku të gjithë mund të prekin sadopak topin me të cilin janë dashuruar miliona njerëz në botë.
Në dy vitet e fundit, një risi mjaft interesante në Shqipëri është ajo e Sunday League dhe kampionatet rajonale 5x5. Një kampionat i mirëfilltë e i strukturuar që ka bashkuar djem e burra me një ëndërr të mbetur në tentativë për t’u bërë futbolliste dhe ish-lojtar profesionistë që ende nuk ua bën zemra të ndahen me topin.
Në një intervistë ekskluzive për Newsport.al, krijuesi i FSHF Sunday League Albania, Jurgen Demneri, ka treguar gjerë e gjatë hapat e para të çeljes së kësaj nisme ndërsa zbulon edhe datën e nisjes për edicionin e ri së bashku me ndryshimin e formatit.
Demneri gjithashtu zbuloi edhe një risi të veçantë siç ështa ajo e e kanalit të ri në YouTube së bashku me një emision sportiv kushtuar futbollit amator që do të lançohet në nisje të kampionateve.
-FSHF Sunday League dhe kampionatet rajonale 5x5, një risi në futbollin shqiptar. Si lindi ideja dhe sa e vështirë ishte të arrihej ky objektiv?
Ideja për të nisur FSHF Sunday League Albania u pa si një mungesë për futbollin amator shqiptar ku siç dihet, fushat e gjelbërta në Shqipëri janë të mbushura nga futbollistët amatorë që luajnë çdo ditë.
Lindi Sunday League Albania pas një certifikimi të marrë nga Sunday League në Angli dhe suportit të FSHF. Patjetër që u prit shumë mirë nga të gjitha ekipet pjesëmarrese, ku në një kohë rekord prej një jave u regjistruan plot 24 ekipe!
Futbolli 5x5, ose kalçeto siç e njohim ndryshe, është mjaft masiv në vendin tonë dhe me suportin e FSHF duke i dhuruar uniforma e duke paguar të gjitha shpenzimet që kërkon një ndeshje, arritëm të bëjmë 140 ekipe të regjistruara në të gjithë Shqipërinë. Presidenti i FSHF, z.Armando Duka është kujdesur personalisht që për futbollin amator të ofrohen gjithmonë kushtet perfekte për zhvillimin e një ndeshje.
Unë jam detajist dhe për mua ka qenë shumë e vështirë që të arrija perfeksionin që në vitin e parë. Por me ndihmën e të gjithëve, dhe patjetër me ndihmën e FSHF-së, besoj se ja kemi arritur qëllimit ta kthejm këtë ligë në një ligë ku të gjithë e gjejnë veten.
-Sezonin e fundit mund ta quajmë të mbyllur me sukses, çfarë surprizash rezervon sezoni i ri?
Sezoni i fundit ishte një sezon mjaft i suksesshëm. 34 ekipe garuan për të dalë kampion ku në fund ekipi i Kastriotëve arriti të kurorëzohej si fituesi!
Në sezonin e ri do të vazhdojmë t’i japim mundësinë të gjithë për të fituar një çmim dhe përsëri do të kemi 4 kupa për të cilat konkurohet. Risia më e fundit do të jetë nje kanal në YouTube dhe një emision mujor ku do të diskutohet mbi të gjitha kompeticionet amatore!
Në futbollin 5x5 do të kemi një risi që nuk do të luhet më me dy faza por do te jetë me një fazë të vetme dhe do të shtohet dhe Kupa e Shqipërisë ku të gjitha rajonet do të luajnë për të shpallur kampionin e Kupës së Shqipërisë e cila do të marri emrin e një ish-futbollisti të njohur shqiptar.
-Cila do të jetë data e nisjes?
Data e nisjes parashikohet të jetë 18 shtatori, por jemi në varësi si do të ecim me regjistrimet dhe sa do të jenë të gatshme ekipet për të qenë gati!
-Sa ekipe pjesëmarrëse do të jenë dhe a do të ketë ndryshim formati si ai i Superiores?
Parashikohet të kemi 36 ekipe pjesëmarrëse në FSHF Sunday League Albania dhe 160 ekipe pjesëmarrëse në futbollin 5x5.
Formatet do të jenë ndryshe nga Superioria ku në të dy kompeticionet do të kemi fazën e grupeve dhe më pas sistemin Play-Off për të shpallur kampionët!
[gallery ids="703649"]
-A ka lojtarë apo ish-lojtarë, trajnerë apo dhe arbitra të cilët u janë bashkuar kësaj nisme? Si ka qenë angazhimi i tyre?
Kemi shumë ish-lojtar dhe patjetër dhe lojtarë të rëndësishëm që i japin tonin kampionateve amatore.
Federata shqiptare e futbollit është është kujdesur që futbollistët amatorë të ndihen si profesionist dhe për këtë është vlerësuar çdo ndeshje ku spikasin ato të Play-Off që vlen të përmendet se arbitrat kanë qenë emra si Juxhin Xhaja, Enea Jorgji, Kridens Meta e të tjerë.
-Nëpër video të ndryshme në rrjete sociale kemi dëgjuar “britma” e atmosferë si në stadiume. A ka patur një interes nga tifozët kjo nismë?
Tifozët në Sunday League janë të shumtë! Sunday League organizohet edhe në Korçë ku marrin pjesë 16 ekipe 11x11 dhe finalja e vitit të fundit duke parë kërkesën e tifozëve, u zhvillua në stadiumin ‘Skënderbeu’ ku pati një numër shumë të madh tifozësh!
Vetë presidenti Armando Duka ishte prezent për të dhënë Kupen dhe u ndje i surprizuar që si mundej aq shumë njerëz të vinin për të suportuar një ekip amator.
[gallery jnewsslider="true" jnewsslider_title="Pamje te tifozeve gjate kampionatit te ketij sezoni" ids="703641,703642,703644,703645,703646"]
-Pra, mund të themi që Futbolli 5x5 është kthyer në diçka masive në vendin tonë apo është ende herët?
Te gjitha sportet amatore në FSHF janë kthyer në diçka masive: FSHF Sunday League, Futbolli 5x5, Futsal, futbolli i plazhit janë të gjitha projekte për të cilat po punohet shumë që të kemi një masivizim sa më të madh të tyre.
-Rezultat historik i Kombëtares shqiptare në Botërorin në Essen. Të jesh pjesë e 32 më të mirave është padyshim krenari.
Rezultati i Kombëtares shqiptare të Socca Albania në Botërorin Essen 2023 ishte një rezultat fantastik! Nuk kam parë ndonjëherë suport si ai që ne kemi patur në Gjermani!
4000 persona çdo ndeshje që brohorisnin për të suportuar lojtarët tanë, gjë të cilën shpresoj shumë të ndodhi në datat 16-17 shtator në Tiranë ku siç dhe e kemi publikuar, Kombetarja jonë do të bëjë 2 miqësore luksi kundër Kombëtares së Italisë si një përgatitje para Europianit dhe kualifikueseve për Botërorin 2024!
//Gledi Fejza
[gallery jnewsslider="true" jnewsslider_title="Kombetarja shqiptare ne Boterorin e Essen" ids="703647,703648"]
Lexo gjithashtu
