Hapësire reklamuese

Çështjet kryesore

ARKIVA

EKSKLUZIVE/ "Fanaticsat më të mirët në Shqipëri", braziliani Gilberto rikthehet mes kujtimeve: Magani i ashpër, Muça i zgjuar... Derbi? Ju tregoj si fitohet

Shkruar nga NEWSPORT

[caption id="attachment_692443" align="alignleft" width="300"] Devi Muka prezantonte Fortunaton[/caption]

Ishte shkurti i vitit 2014-të. Shkallët e stadiumit "Qemal Stafa" ishin të mbushura plot me tifozë kryeqytetas. Tirana dhe Partizani përballeshin në impiantin legjendar. 90 minutat ishin të luftuara dhe gjithçka në fillim u duk se do të shkonte drejt barazimit. Por, në minutën e 76-të, Gilberto Fortunato ngriti "peshë" stadiumin. Me një roveshatë të bukur, arriti të realizonte një gol që i dha 3 pikë bardhebluve.

Sot, është 35-vjeç. Megjithatë është pjesë e futbollit të luajtur. Braziliani nuk mundi të bënte shpërthimin e madh në Shqipëri, por për këtë nuk ka një peng. Ai kthehet para derbit të radhës mes Tiranës dhe Partizanit. Në një intervistë ekskluzive për Newsport.al, Gilberto tregon se si shkon karriera e tij. Kujton me detaje çdo gjë që ka bërë në Shqipëri, si dhe zbulon dy lojtarët me të cilët mban ende kontakte.

Kampionati shqiptar duket se kalon kufijtë e vendit tonë dhe këtë e thotë 35-vjeçari që tregon se herë pas herë sheh ndeshje të ndryshme. Tiranën e ka ndjekur, tifoz i rregullt i bardhebluve. Bën parashikimin e tij për derbin me një detaj interesant. Ndërkohë nuk mund të lërë pa zbuluar edhe dëshirën. Një ditë dëshiron të rikthehet në vendin tonë mes Fanaticsave për të treguar ngjarjet dhe historitë me njëri-tjetrin për gjithë këto vite të ndarë.

- Gilberto përshëndetje! Me siguri nuk e dini, por në Shqipëri vijojnë t'iu kujtojnë si brazilianin "vrastar" të derbit. Si vijon karriera juaj në Brazil?

Përshëndetje! Më lejoni t'iu falënderoj që më dhatë mundësinë të kthehem pas në kohë me kujtime kaq të bukura. Unë vazhdoj të luaj ende futboll me skuadrën e Inhumas në ligën e Brazilit. Shpresoj dhe kam dëshirë që të vijoj të jem aktiv në fushë të paktën edhe për 2 vite të tjera.

- Çfarë kujtimesh ke nga Shqipëria?

Shqipëria ka mbetur në mendjen dhe zemrën time. Më kujtohet shpesh aventura ime atje kur flas me shokë të skuadrës këtu ose kur shoh diçka në rrjetet sociale nga miqtë e mi në Shqipëri.

- Te Tirana nuk munde të shpërtheje, por derbi me Partizanin të shkruar emrin në historinë e futbollit shqiptar...

Sezoni im me Tiranën, mund ta konsideroj si ndër më të bukurit e karrierës sime. Të veshësh fanelën e asaj skuadre padyshim nuk është një moment i zakonshëm për një futbollist.

- Aq sa kujton, si ke kaluar asokohe te Tirana?

Më kujtohen shpesh shumë gjëra. Por, mund të veçoj grupin që ishim. Dëshira për të bërë maksimumin, shpirti i garës së atyre lojtarëve, cilësia e tyre, e bënin Tiranën ekipin më të mrekullueshëm në Shqipëri.

- Me kë nga ish-shokët e skuadrës në Shqipëri ruani kontakte?

Kam kontakte me ish shokë skuadre te bardheblutë. Flas më shumë me Erando Karabecin dhe Gent Muçën. Dje fola me të për ditëlindjen duke i çuar të gjithë përgëzimet e mia.

- Në Shqipëri jemi sërish në prag derbi...

[caption id="attachment_692444" align="alignright" width="300"] Fotunato gjatë një ndeshje derbi[/caption]

Eh, derbi. Më kujtohet disa herë, e diskutoj dhe me miqtë e mi. Mbaj mend ashpërsinë që kishte. Kënga e tifozërive në shkallët e stadiumit, lufta e ashpër për çdo top në fushë. Dhe sigurisht në fund, më kujtohet kur fitonim dhe lumturia zgjaste përtej fushës së blertë. Fantastike!

- Si është t'i shënosh Partizanit?

T'i shënosh Partizanit është emocion i veçantë. Ishte e vështirë, por edhe e mrekullueshme në të njëjtën kohë. Ndeshjet derbi janë gjithmonë shumë emocionale. Ju siguroj se nuk është një përballje e zakonshme.

- Si një sulmues me eksperiencë dhe në një sfidë me doza të larta emocionale, si mund të realizohet një gol në portën kundërshtare?

Si mund të shënohet në një ndeshje derbi? Unë si sulmues e kam provuar këtë ndjesi. Megjithatë është shumë e vështirë. Hapësirat janë të vogla për të bërë veprimet që mund të kesh në mendje. Si skuadër duhet të jesh shumë i mprehtë. Pret nga momenti në moment për të shënuar dhe fituar derbin.

- Në 2014-tën, goli juaj me Tiranën u shndërrua si në një mallkim për bardheblutë, të cilët nuk fituan për plot 5 vit e gjysmë një përballje derbi...

Po, e di. Goli im i fundit me Tiranën bëri që ajo skuadër mos të fitonte më për shumë vite. Por besoj se bardheblutë nuk kanë qenë në momente të mira në aspektin financiar. Por, tani duke se është shumë më mirë.

- A e keni ndjekur më kampionatin shqiptar?

Kam mundur ta ndjek kampionatin shqiptar. Jam përpjekur të shoh ndeshjet kryesore. Është një kampionat interesant.

- Tirana vijon t'i besojë brazilianëve. Tanimë në organikë është Patrick. E njihni?

Jo, nuk e njoh Patrick. Por, kam parë që ishte lojtar i rëndësishëm dhe shënonte gola të bukur deri në momentin e dëmtimit.

- "Tirana Fanatics", tifozët bardheblu. Mendimi juaj për ata?

Sa i përket tifozërisë, "Fanaticsat" janë më të mirët në Shqipëri. Kudo që Tirana luante, ata ishin aty. (Qesh). Më kujtohet shumë mirë Gugash Magani në vitin 2014 dhe Shkëlqim Muça në 2015-tën.

- Dy trajnerët që keni punuar te Tirana?

Magani ishte shumë i ashpër sa i përket disiplinës dhe taktikës. Por, ai kishte ndjeshmëri të madhe me lojtarët. Kështu që ne të gjithë e ndjenim se ai dëshiron për ne më të mirën dhe në këtë mënyrë na motivonte dyfish. Ndërsa Muça nuk qëndroi shumë me ne. Por, e mbaj mend që ishte shumë i zgjuar si trajner.

- A patët më një ofertë nga një klub shqiptar pas largimit nga Tirana?

Jo, pas vitit 2015-të nuk pata kurrë një ofertë nga klubet shqiptare. Kam kaluar një aventurë fantastike në Azi dhe vendosa të qëndroj atje për disa vite.

- Si e parashikon derbin e së mërkurës?

Ndeshja derbi, është gjithmonë e vështirë për t'u parashikuar. Por, është ndeshja e sezonit për të dyja skuadrat. Parashikimi im është se Tirana do të fitojë 1-0 me një goditje këndi njësoj si unë në fund të ndeshjes.

- A keni një mesazh për tifozët e Tiranës?

Faleminderit shumë tifozë të Tiranës. Me ju kam kaluar një kohë të mrekullueshme, nuk do iu harroj asnjëherë në jetën time.

- E fundit! A do të ktheheshit sërish në Shqipëri?

Do të më pëlqentë të rikthehesha në Shqipëri, ndoshta për të luajtur futboll është pak vonë. Megjithatë do të doja të vija për të takuar njerëzit dhe për të kaluar pak kohë duke kujtuar gjërat që kemi bërë gjatë gjithë këtyre viteve që nuk kemi qenë bashkë. /Retin TOKA/

 

Poll

Lexo gjithashtu

Superiore - Ndeshjet

Kategoria Superiore

Itali - Serie A

Spanjë - La Liga

Angli - Premier League

Gjermani - Bundesliga