Vendosi të largohej nga Superiroja në merkaton e verës për të nisur një aventurë të re në Vala Superliga në Kosovë. Endri Magani, sulmuesi i njohur i kampionatit shqiptar ka dhënë një intervistë enkas për newsport.al ku ka folur për ndryshimet mes Superiores dhe Vala Superligës.
Financat mbeten problem për kampionatin tonë, ndërsa në Kosovë i biri i Gugash Maganit tregon se situata është krejt ndryshe. Si është të punosh me babain? Këtë e zbulon Endri, i cili heq “dorezat” duke thënë gjithçka ashtu si e mendon.
– Nga Superiorja në Kosovë. Sa ndryshon kampionati ynë nga Vala Superliga?
Mund t’iu them që Vala Super Liga ende s’është në nivelet e Superiores, por nga viti në vit po njeh progres. Mendoj që shumë shpejt do të bëhet një kampionat i fortë.
– Jeni pjesë e Gjilanit. A jeni i kënaqur në Superligën e Kosovës?
Është një eksperiencë e re dhe njëkohësisht e bukur. Mund t’iu tregoj që ka qenë babai im ai që këmbënguli që unë të vazhdoja karrierën te Gjilani. Di të them që jam ndjerë shumë mirë.
– Në vendin tonë flitet se financiarisht atje futbolli është më lart se këtu. A ka diçka të vërtetë?
Po është shumë e vërtetë. Klubet janë shumë korrektë me pagat dhe normalisht kjo gjë për një futbollist është gjë e mirë. Jemi profesionistë dhe paguhemi për punën që bëjmë.
– Në këtë periudhë merkato, nuk do të ishte çudi nëse do të ktheheshit në Shqipëri. A keni pasur oferta?
Po kam pasur oferta nga Kategoria Superiore, por unë vendosa që deri në fund të sezonit të vazhdoj në Gjilan duke respektuar edhe kontratën.
– Babai juaj, Gugashi do të drejtojë Besën e Kavajës. A do t’i bashkoheshe verdhezinjve apo s’është në dëshirën tënde?
Kam shumë besim te babai im. Jo se është im atë, por ia njoh karakterin që ka. Gjithmonë kur merr drejtimin e një ekipi, ai mundohet të japë gjithmonë më të mirën. E bën me shpirt e zemrë punën e tij dhe mendoj që këtë edicion, do ta ngjisë në elitë Besën e Kavajës.
– Sa e vështirë është të punosh me babain?
Kam punuar me babain dhe normalisht në Shqipëri është shumë e vështirë pasi ndihesh i paragjykuar. “Hajde se ky është djali i Gashit dhe do të luaj në formacion”, kam dëgjuar të thonë. Por, kurrsesi s’ka ndodhur kështu. Mund të kem ngrohur stolin edhe kur mund të isha në formë të mirë. Për më tepër kur ke trajner babain tënd, të lind detyra të japësh 200 përqind të fizikut tënd për të luajtur.
– Vala Superliga është ndërthurur me lojtarë nga Superiorja. Me cilin nga lojtarët që keni luajtur në vendin tonë keni miqësi të mirë?
Miqësi kam me shumë lojtarë. Por, shok të mirë kam Ansi Nikën.
– Në Shqipëri, për titull luftojnë Partizani, Kukësi, Teuta dhe Skënderbeu. Cilin nga këto ekipe sheh si pretendent?
Janë shumë skuadra që luftojnë për titull dhe është e vështirë të japësh një përgjigje. Mirëpo unë mendoj se do të jenë Partizani, Kukësi dhe Skënderbeu deri në fund. Nuk mbetet pas as Teuta me Flamurtarin. /Retin TOKA/
Loading ...
