Aristoteles Romero ndodhet në telashe. Mesfushori i Partizanit është shoqëruar në polici pasi e dashura e tij, Raulimar Diaz e ka akuzuar se e ka dhunuar. 24-vjeçari i të kuqve po merret në pyetje nga oficerët e policisë gjyqësore. Por, çfarë ka ndodhur mes çiftit venezuelian?
Newsport.al ka mësuar se të dy ndodhen në ambientet e komisariatit numër 2 në Tiranë. Mbrëmjen e djeshme, mes tyre ka pasur një debat, që më pas ka konsistuar në dhunë, të paktën sipas të dashurës së Romeros.
Burime për newsport.al tregojnë se kjo e fundit i ka kërkuar mesfushorit 200 euro për t’ia dërguar prindërve në Venezuelë. Por, 24-vjeçari ka refuzuar dhe nuk ia ka dhënë. Sipas dëshmisë në komisariat, në atë moment Raulimar ka debatuar gjatë me të, ndërsa ka pasur një të shtyrë nga bashkëjetuesi.
Kaq ka mjaftuar dhe ajo është larguar nga banesa duke iu drejtuar një hoteli në kryeqytet. Pas një bisede me pronarin e hotelit, ku i ka treguar se çfarë ka ndodhur, ky i fundit ka lajmëruar policinë. Uniformat blu kanë marrë në pyetje fillimisht bukuroshen venezueliane dhe më pas kanë shkuar në banesën e Romeros. Të dy janë shoqëruar në komisariatin numër 2.
Tanimë ndodhen në një dhomë në komisariat, ndërsa mësohet se Raulimar nuk pranon të bëjë kallëzim. E dashura e Romeros ka prerë biletën e udhëtimit drejt Venezuelës në 16 maj dhe nëse kallëzon mesfushorin, atëherë duhet të qëndrojë si dëshmitare në Shqipëri pasi lojtari i Partizanit do të merrej i pandehur. Të dy janë duke biseduar për të gjetur një marrëveshje, ndërsa theksohet se ajo është shprehur se dëshiron të qëndrojë sërish në një banesë me Romeron. /Retin TOKA/
