Juxhin Xhaja është përzgjedhur për të vënë drejtësi nesër në derbin mes Tiranës dhe Partizanit. Burime të sigurta bëjnë me dije për newsport.al që gjyqtarit të kolegjiumit kryeqytetas i është besuar kjo sfidë mjaft e rëndësishme për javën e gjashtë të Superiores.
Takimi është vlerësuar maksimalisht nga sektori i arbitrimit në FSHF, duke caktuar 6 gjyqtarë, 2 prej të cilëve do të jenë pas porte. Denis Rexha dhe Rejdi Avdo do të jenë arbitrat e linjës, ndërsa Nertil Bregasi i katërt. Ndërkohë Kreshnik Bajramaj dhe Emanuela Rusta, do të jenë gjyqtarët e linjës të pozicionuar pas portave.
Kjo supersfidë është programuar të zhvillohet në orën 18:00, në “Air Albania Stadium”, teksa do të jetë Xhaja që do të vendosë drejtësi. 30-vjeçari është një emër i njohur për derbin kryeqytetas dhe për sportdashësit shqiptarë. Ai drejtoi përballjen e këtyre dy ekipeve në sezonin e shkuar, kur Tirana triumfoi me rezultatin e thellë 5-1 ndaj të kuqve.
Dy penallti të dhëna dhe plot 6 gola të shënuar në një ndeshje që veç emocioneve, prodhoi edhe spektaklin në fushë. Pas sfidës, asokohe drejtori Olsi Rama pati rezerva për gjykimin e tij. Megjithatë gjithçka mbetet e shkuar dhe nesër në “Air Albania Stadium” fillon një kapitull i ri. /Retin TOKA/