Sajti prestigjoz i të dhënave të lojtarëve dhe ekipeve, Transfermarkt, ka publikuar të dhënat e reja për vlerën e lojtarëve të Superiores. Partizani vijon të mbajë vendin e parë por të kuqve u rritet vlera me gati 500 mijë euro më shumë. Nga 5.3 milionë, tani Partizani shkon në 5.78 milionë euro me Matondo, Hadroj, Rrapaj, Da Silva e Mba që pësojnë një rritje të madhe të vlerës së kartonit.
Tirana qëndron e dyta por edhe bardheblut kanë patur ngritje me 200 mijë euro. Florent Hasani vijon të jetë në krye për lojtarët por kësaj rradhe i është bashkuar Matondo në kuotën e 500 mijë eurove. Tirana mbante podiumin e lojtarëve me Lushkjan dhe Bekajn pas Hasanit por në përditësimin e fundit, ata parakalohen nga katërshja e sipërpërmendur të Partizanit.
Egnatia është për rekord. Rrogozhinasit pësojnë një ngritje prej plot 1 milionë eurosh. Performancat fantastike të yjeve si Dëamena, Kasa, Fernando e të tjerë kanë bërë që edhe vlera e tregut të rritet ndjeshëm nga 3.5 milionë euro shkon në 4.53 milionë euro.
Vllaznia humbet vendin e saj në podium teksa vlera i bie në 4.43 milionë nga 5 sa ishte më para. Rezultatet negative në dy fazat e fundit kanë bërë që vlera e lojtarëve kryesorë si Gurishta, Jonuzi, Marku, Balaj, Latifi të bien.
Vendi i pestë mbahet nga Bylis. Çuditërisht, ballshiotët kanë një nga ekipet më me vlerë në market por në fushën e lojës nuk kanë arritur ta justifikojnë teksa gjenden në vendin e parafundit. Ndjekur nga Laçi, Kukësi e Teuta, këto ekipe nuk pësojnë ndryshime të mëdha por secila bie në vlerë.
Pas Egnatias, është Erzeni skuadra që ngrihet më shumë në vlerë teksa nga 2.71 që kuotohej më parë tashmë shkon në 3.05 milionë euro. Lojtarë si Kahrimanovic, Nonato, Mehmeti etj janë kthyer në asete për shijakasit.
Për Kastriotin, situata në fushë pasqyrohet edhe këtu. Krutanët vlenin 3.6 milionë përpara pak javësh ndërsa tani kanë pësuar një rënie të madhe prej 1 milionë eurosh.
Lexo gjithashtu
