Prej 26-vitesh ai pret që të mos jetë kampioni i fundit i Partizanit, por që emra të tjerë të rihapin sërish librin e historisë së 15-herë kampionëve të Shqipërisë. Ish-sulmuesi i të kuqve në vitet '80 dhe '90 Edmond Dosti ka ardhur posaçërisht në Tiranë nga Austria për të ndjekur derbin e 152-ë në histori midis Tiranës dhe Partizanit. Ish-"Këpuca e Artë" e vitin 1993 në Superligë duke patur luksin të fitojë dhe titullin e 15-ë me kryeqytetasit rrëfen emocionet dhe përjetimet e derbit të Tiranës në periudhën kur ai mbante veshur "kostumin" e njërit prej "aktorëve" të shumtë të rivalitetit historik Tirana-Partizani.
Në një intervistë për Newsport, Dosti kthehet pas në kohë për të peshuar futbollin e sotëm shqiptar me atë të kohës para ardhjes së demokracisë në Shqipëri. Në veçanti, ai zbulon dhe cilësitë e karakterit si futbollist të trajnerit aktual të Partizanit Skënder Gega, me të cilin kanë ndarë shumë vite në fushe me të njëjtën fanelë. Ndaj tij, Dosti ruan një admirm të veçantë.
-Si është të përjetosh derbin si futbollist (dikur) ndërsa sot si tifoz?
Janë përjetime të ndryshme. Si futbollist, emocionet për derbin na zinin që një javë para se të ;uhej ndeshja dhe rritej gradualisht deri në ditën e ndeshjes. Kurse si tifoz, normal e shikon më me gjakftohtësi takimin. Bile, me lojtarët e Tiranës takoheshim vazhdimisht, kemi qenë si shokë. Por, brenda fushës, për 90 minuta ishim kundërshtarë. Ndërsa sot derbi është ekzagjeruar shumë. Pavarësisht rivalitetit, duhet të jepet mesazhi që sporti triumfon, jo armiqësia.
-Në kohën tuaj, të falte më tepër kënaqësi të shënoje dhe të fitoje derbin apo titulli vlente mbi të gjitha?
Jo vetëm derbi, por çdo ndeshje vlerësohej maksimalisht, por ta fitoje derbin ishte kënaqësi e veçantë. Sa për mua, personalisht, të shënoja jo vetëm në derbi, por në çdo ndeshje e kisha detyrim, sepse sulmuesi jeton me golat. Në lidhje me titullin, ka qenë domosdoshmëri ta fitoje sidomos për 3 ekipet e kryeqytetit Dinamon, Tiranën, Partizanin, por ishte dhe Vllaznia, shto dhe Flamurtarin që në ato vite po prodhonte futboll të bukur dhe po jepte rezultate të mëdha.
-Nga sa kujtoni, cilat kanë qenë batuta më të përdorura në periudhën para demokracisë në derbi, që sot mbase nuk dëgjohen më të thuhen?
Nuk mbaj mend saktësisht, po ka qenë ajo me rezultatin 8 me 2.
-A provokoheshit atëherë nga tifozët kundërshtarë?
Sa herë që luhej derbi, tifozeritë vendoseshin në mënyrë të barabartë në stadium. Për ne rëndësi kishte të ishe profesionist brenda dhe jashtë fushe. Luanim për futboll të pastër, luftonim për fanelën.
-Më e vështirë të fitoje një derbi apo një titull atëherë apo sot?
Nuk diskutohet që në atë kohë ishte shumë herë më e vështirë të fitoje një derbi apo një kampionat. Të gjitha skuadrat ishin të plotësuara mirë. Pastaj dhe konkurenca për të zënë vend në formacionin titullar ka qenë shumë e madhe. P.sh. unë jam përzgjedhur ndërmjet 20 sulmuesve për të veshur fanelën e Partizanit.
-Të kalojmë te Partizani. Pavarësisht se e kanë administruar shumë mirë kampionatin, a gjeni ndonjë difekt apo anë të dobët tek ata?
Sugjerimat e mia për t'i rregullua disa pika i kam shprehur dhe në intervista të tjera. Partizani ka bërë një kthesë të madhe këtë sezon. Trajneri (Skënder Gega) ka krijuar frymën kolektive. Ka bërë vërtet punë të mirë. Pavarësisht se shumicën e ndeshjeve i fitojnë minimalisht, në futboll mund t'ia dalësh të shpallesh kampion me këtë rezultat minimal. Por, them se me një qendërsulmues të mirë, Partizani do të kishte siguruar më shumë pikë. Në merkaton e janarit, është e vështirë të gjesh lojtarë cilësorë, jo më sulmues race. Skuadrës (Partizanit) i duhet patjetër qendërsulmues. Insistoj në këtë pikë.
-Kë do të zgjidhje si lojtarët më cilësorë nga ky Partizan?
Partizani dallon këtë sezon për forcën e grupit, por normale që ka elementë që spikasin. Do të zgjidhja Trashin, Asanin, Malën, Bardhin, Telushin, pa u hequr meritën dhe pjesës tjetër.
-Keni luajtur bashkë me Gegën. Çfarë karakteri kishte si lojtar? Mendonit se do të bëhej trajner i mirë?
Qoftë si lojtar, qoftë si njeri, ai ka karakterin e fortë. Kishte ego, në kuptimin e mirë. Ajo çfarë ka bërë mirë, është se ka përçuar karakterin e tij te skuadra. Lojtarët luftojnë fort me njëri-tjetrin. Gega është njeri i drejtpërdrejtë, i thotë gjërat në sy. I ka bërë lojtarët të mendojnë se mund të japin të gjithë kontributin për ekipin dhe që secili mund të zëvendësohet.
Përderisa ka arritur në këtë nivel si trajner, natyrisht që ai ka patur ambicie dhe e ka kërkuar një gjë të tillë. Ka bërë sakrificë të madhe, sepse ka lënë SHBA-në dhe jetën e tij atje për të ndihmuar Partizanin. Ka vërtet guxim.
-Në kohën tuaj, të shënoje shumë gola nuk ishte problem. Kam parasysh "bombera" me shumicë si i ndjeri Kujtim Majaci, ju, Kliton Bozgo, Shkëlqim Muça, Agustin Kola, Sokol Kushta, etj. Sipas jush, sot shënohen më pak gola sepse sulmuesit në periudhën kur ju luanit ishin më cilësorë apo ka ndikuar dhe ndryshimi i mentalitetit të futbollit në Shqipëri?
Besoj se sulmuesit e asaj kohe jo vetëm që kanë qenë më cilësorë, por kanë qenë më të përgatitur, më luftarakë, më kërkues në lojë. Jetonim me ego për të shënuar. Një sulmues e ka detyrë të shënojë sepse, siç e thashë dhe më para, ai jeton me golat.
-Nëse ky Partizan me këta lojtarë dhe këtë trajner fiton titullin, a mund të krijohet mundësia për të patur një lloj dominimi në vitet e ardhshme? Do të vazhdojë sërish kapitulli me Gegën trajner?
Kam qenë ndër të parët që të iniciohet një projekt afatgjatë për Partizanin. Ata po shkojnë drejt asaj që të gjithë tifozët e kuq presin. Nuk besoj se do të gabojnë po ta shkarkojnë në fund të sezonit Gegën. Me sa kam parë, presidenti i klubit Gazmend Demi nuk bën gabime në këto gjëra.
Pastaj, pas këtij sezoni, normale që do të bëjnë përforcime cilësore, sepse do të mendojnë dhe për pjesëmarrjen në aktivitetet europiane. Janë të dënuar për të dalë kampionë. Ambicia për tituj të tjerë do të rritet.
-Nëse Partizani fiton titullin, ju si do ta festoni? Zakonisht, lojtarët apo tifozët p.sh. zhyet në pishinë apo në det? Ju do të bëni ndonjë lloj çmendurie në festë?
Natyrisht, që unë do të jem në Tiranë, n.q.s. fitojmë. Do të jetë surprizë, por nuk jam i këtyre çmendurive të tilla./Dario Velaj/.
Lexo gjithashtu
