Franco Lerda u shkarkua mbrëmjen e së shtunës nga pankina e Partizanit. Humbja në derbi (1-2) i kushtoi shumë trajnerit italian, që me vendim unanim të presidentit Gaz Demi u detyrua të largohej nga kampionët. Megjithatë 52-vjeçari nuk është larguar ende nga Tirana. Burime të besueshme bëjnë me dije për Newsport.al që ai do të ikë nga kryeqyteti pas dy ditësh. Shkak për këtë është bërë mungesa e Olsi Ramës që ndodhet në Itali.
Drejtori i të kuqve nuk ka qenë fare prezent në gjithë situatën e krijuar, teksa është larguar menjëherë pas derbit në shtetin fqinj. Kësisoj Lerda do të takojë të fundit edhe drejtorin e të kuqve, njeriun që e solli te kampionët dhe më pas do të kthehet në vendlindje. Sigurisht largimi i italianit në mënyrë te tillë, pa praninë e Olsi Ramës, ka lënë shije të hidhur te drejtori i të kuqve. Zhvillime të reja dhe mjaft të rëndësishme priten në kampin e kuq, por fillimisht duhet të mbyllet faza e dytë e Superiores.
