Presidenti i FSHF-së, Armand Duka ka folur dje në emisionin “Fair Play” edhe për marrëdhëniet e tij me presidentin e Partizanit, Gazmend Demin.
Ky i fundit nuk ishte prezent në darkën festive që organizoi FSHF-ja me rastin e festave të fundvitit, duke lënë të kuptohet se mes Dukës dhe Demi ka ndonjë “krisje” të marrëdhënieve.
Gjithsesi, Duka e hodhi poshtë një hamendësim të tillë duke pranuar: “Demin e kam mik. Madje kam më shumë miqësi me të, sesa me presidentët e tjerë të klubeve të Superligës.
Partizani nuk mund ta luajë derbin në Tiranë, sepse nuk e ka një stadium të vetin në kryeqytet. FSHF-ja nuk mund të detyrojë bashkinë që të lejojë të kuqtë të luajnë në ‘Selman Stërmasi’. Do të donim të ndodhte e kundërta, por ja që nuk kemi ç’të bëjmë në këtë situatë”, deklaroi Duka.
