Ishte bërë kohë e gjatë që të gjithë e prisnim nisjen e punimeve për ndërtimin e një stadiumi kombëtar, pikërisht “Qemal Stafan”. Por, kur të gjithë marrin guximin që të nisin një punë kaq të madhe dhe që do t’i shërbejë të gjithëve, ka edhe nga ata që nuk e duan diçka të tillë. Pikërisht pronarët e bizneseve, krysisht bareve dhe restoranteve që rrethojnë stadium, të cilët nuk kanë bërë boshatisjen e ambienteve.
Sipas drejtorit të stadiumi, Eduard Prodani, është bërë njoftimi i tyre për lirimin e hapësirave, ndërsa sot në ditën kur ishte nisja e punimeve, këto biznese vazhdojnë të jenë në punë. “Problemi momental, por që mendoj që do të gjejë zgjidhje shumë shpejt, janë ambientet që vazhdojnë punën e tyre edhe pse ne i kemi njoftuar që të largohen. Njoftimet janë dhënë në kohë, por ata e kanë marrë lehtë dhe pikërisht po na vonojnë për prishjen e ambienteve rrethuese të stadiumit”, sqaron fillimisht drejtori i stadiumit.
Më tej ai sqaron sesi do të veprohet: “Si fillim do të shkatërrohet pjesa rrethuese e stadiumi, e cila do t’i hapë punën edhe pjesës më të madhe të punimeve. Megjithatë, për momentin shpresojmë që të mbyllim këtë çështje që kemi dhe më pas të vazhdojnë punimet në normalitet”, thotë Prodani. Ndërkohë që nuk kanë munguar edhe forcat e policisë bashkiake, të cilët i kanë ardhur në ndihmë firmës që po kryen punimet.
