Dhuna në stadiume, klubi shqiptar “mëson” nga SKËNDERBEU

Përpara nisjes së edicionit të ri të Kategorisë së Parë klubi i Tomorit ka marrë masat për të shmangur incidentet dhe dhunën brenda stadiumit të saj. Klubi beratas ka ndjekur shembullin e Skënderbeut duke vendosur kamera brenda stadiumit për të vëzhguar sigurinë gjatë ndeshjeve të futbollit. Nisur nga problemet që u shkaktua në ndeshjen e parë të sezonit të Kategorisë Superiore midis Partizanit dhe Skënderbeut, Tomori ka marrë përsipër detyrën e menaxhimit me forcat e veta të ndeshjeve të kampionati pa praninë e policëve. Beratasit kanë kërkuar instalimin e 15 kamerave të sigurisë që do të identifikojnë elementët problematikë dhe të rrezikshëm që mund të sjellin probleme gjatë takimeve. Me këtë gjë ata i japin një mesazh të qartë tifozëve problematikë duke premtuar se nuk do të njohë tolerime për shkelje të rendit dhe rregullit brenda stadiumit.