Kur Anglia mendoi se do të mbyllte ndeshjen në barazim dhe do të merrte fitoren e parë në finalet e një Europiani, ka ndodhur e papritura, Berezutski nuk fal dhe me daljen e parë përpara kuadratit shënon. Në shifrat 1-1 mbyllet dhe ky takim, i cili nuk ishte si vlerë e asaj që u pa në fushën e lojës, por ky është futbolli, i magjishëm sepse ndodh edhe e papritura.
Angli – Rusi 1-1
Shënues: Dier 74′ / Berezutski 92′
Anglia: Hart, Walker, Rose, Cahill, Smalling, Sterling, Lallana, Kane, Rooney (Wilshere 77′), Dier, Alli. Trajner: Roy Hodgson
Skema: 4-3-3
Rusia: Akinfeev, Smolnikov, Ignashevich, Neustädter (Glushakov 80′), Kokorin, Smolov, Golovin (Shirkov 77′), V. Berezutski, Shatov, Schennikov, Dzyuba. Trajner: Leonid Slutski
Skema: 4-2-3-1
Gjyqtarë: N.Rizzoli, E. Di Liberatore, M.Tonolini (Itali)
Kartonë të verdhë: Cahill 62′ / Schennikov 73′
Stadiumi: “Velodrome Marseille”
Pjesa e parë – Fraksioni i parë i lojës ka nisur me ritëm të lartë nga të dyja skuadrat. Ndonëse Anglia ka fatin kundra, pasi nuk ka fituar asnjë ndeshje hapëse të Europianit, sërish të besuarit e Roy Hodgson janë të destinuar të luftojnë për të bërë maksimumin dhe për të marrë tri pikët e para në grup. Rastin e parë e shënon Sterling në minutën e dytë, ndërsa nuk mungojnë rastet nga rusët, të cilët kërcënojnë në minutën e 7 me Dzyuba. Për disa minuta radhazi rusët shfaqen rrezikshëm në portën e Joe Hart, por pa mundur të shënojnë. Llallana në minutën e 22 i ka të gjitha shanset për të shënuar, por bën më të vështirën, e nxjerr jashtë sferën.
Rusët janë të përgatitur më së miri, ndërsa trajneri i tyre, i cili është më i riu në moshë në këtë Europian, jep udhëzime nga pankina, ndërsa skuadra i përgjigjet në nivelin e kërkuar. Nivelin e lojës e kanë më të lartë anglezët, të cilët kontrollojnë topin në përqindje të konsiderueshme, kundrjet rusëve që preferojnë më shumë të mbrohen sesa të sulmojnë. Deri në këtë minutë rastet flasin për londinezët, ndërsa Kane në minutën e 37 kërcënon rrezikshëm portën e Akinfev, por pa mundur të shënojë.
Dhurojnë spektakël anglezët, të cilët përveçse zotërojnë topin, janë të qartë në pasime, sidomos në daljen përpara portës së miqve. Çdo aksion është i studiuar dhe nuk gabojnë në gjuajtje, por Akinfev është në lartësinë e duhur dhe e mbron mirë portën.
Pjesa e dytë – Rusia e nis me “kërcënim”, por vijërojtësi italian e nxjerr në pozicion jashtë loje Kokorin, pasi mund të dilte përballë Hart dhe të shënonte. Ndërsa “tre luanët” marrin në dorë frenat e lojës dhe kërcënojnë me Sterling, i cili nuk tregohet i vëmendshëm në nivelin e duhur, pasi mund të kishte shfrytëzuar mundësinë e minutës së 52 dhe të kishte shënuar. Uejn Runi në minutën e 55 lëshon një goditje potente nga distanca, por që përfundon mbi kuadrat. Kështu, në 10 minutat e para të lojës janë anglezët që “dirigjojnë” takimin, por mungon goli.
Rusët mbrohen mirë, madje shihet qartë që numri i mbrojtësve shkon në pesë të tillë e herë në gjashtë për të shmangur rrezikun, megjithatë nuk mungojnë kundërsulmet që janë mjaft të rrezikshëm. Në minutën e 63 është Smolov që pa hyrë në zonë gjuan me të djathtën, por ngjitur me shtyllën e majtë pingule të Hart. I vëmendshëm në gjuajtje Smolov, pasi portieri ishte në kundërkohë.
Uejn Runi në minutën e 71 provon kuadratin, por Akinfev dhe shtylla largojnë topin që mund të hynte në rrjetë, teksa sfera shkon në këmbët e një tjetër lojtari anglez, por që ky i fundit gjendet në pozicion jashtë loje. Tre minuta më vonë një goditje dënimi në hyrje të zonës së rreptësisë i besohet të riut Eric Dier që vjen nga radhët e Tottenham, gjuan saktë dhe tund rrjetën! Rusët nuk dorëzohen, teksa në fund bëjnë lëvizjet e duhura dhe me një dalje përpara portës është kapiteni Berezutski që gjen rrugën e rrjetës. Anglezët mendojnë se ishte pozicion jashtë loje, por në minutën e dytë të shtesës rusët barazojnë shifrat. Me kaq mbyllet dhe ky takim, i cili shënon barazimin e parë në këtë Europian.
