Armand Duka do të kandidojë në zgjedhjet e 7 shkurtit të këtij viti për një vend në Komitetin Ekzekutiv të UEFA-s. Kreu i Federatës Shqiptare të Futbollit kërkon të bëhet anëtar i qeverisë së futbollit europian. Prej ditësh, ai ka nisur lobimin e fuqishëm teksa e kemi parë në takime me presidentë të Federatave të Futbollit nëpër vende të ndryshme. Së fundmi, kreu i FSHF-së arriti të sillte në vendin tonë, kreun e Federatës së Futbollit anglez, Grek Clarke. Një figurë e njohur në një nga kampionatet më të ndjekura në botë zgjedh të vizitojë vendin tonë dhe njëkohësisht shtëpinë e futbollit shqiptar.
Ndërtimi i Arenës Kombëtare ka marrë jehonë ndërkombëtare e sigurisht këtë vepër të mrekullueshme, s’mund ta linte pa parë nga afër edhe zoti Clarke. I shoqëruar nga presidenti Duka, ai shprehu hapur kënaqësinë e tij për stadiumin e ri që po ndërtohet mes kryeqytetit. Në pamje të parë gjithçka duket bukur dhe në fakt ashtu është. Po sikur “Arena Kombëtare” të ishte e fundit e ndërtuar në infrastrukturën moderne? Sa bukur do të ishte, kushedi si do të ishin stadiumet e tjerë. Por, sa shumë probleme që ka futbolli ynë.
Ka aq shumë sa që kur shikon të ndërtohet ky impiant i ri, menjëherë të vjen në mendje Kategoria e Parë, e Dytë dhe me radhë, me baltën dhe topin që duket sikur është prej lecke. Nuk mund të shpëtojë as elita, pasi së paku në ligat inferiore kanë një fushë për të luajtur, por në Superiore ekip si Partizani që synon dhe është në rrugën e duhur për titullin kampion, nuk ka ende “shtëpi për të futur kokën”.
Pra, ndërtimi i Arenës Kombëtare në vend është vlerë e shtuar për futbollin shqiptar, por praktikisht “Dielli s’mund të mbulohet me shoshë”. Presidenti Duka po lobon fuqishëm për një vend në kabinetin qeveritar të futbollit europian, por fakt mbetet që futbolli shqiptar është ende shumë larg Europës. Gëzohemi dhe krenohemi me një stadium, imagjino sa të tillë kanë Anglia, Italia, Spanja, Franca e shumë liga të tjera të futbollit europian. / Retin TOKA/