E gjithë vëmendja tashmë është kthyer te Elseid Hysaj. Mbrojtësi i djathtë i kuqezinjve, i cili është dhe lojtari më i shtrenjtë i Kombëtares do të mbajë shiritin e kapitenit në sfidën e së mërkurës kundër Francës. Por, si të mos mjaftonte presioni që ky lojtar ka mbi supe për detyrën e re, shtohet edhe ai mediatik. Gazetarët gjatë konferencës për shtyp kanë “bombarduar” Amir Abrashin me pyetje për kapitenin e ri, por ai ka ditur t’ia dalë. “Hysaj është lojtar i mirë. Luan me ekip të madh si Napoli dhe ka eksperiencën e duhur për të luajtur ndeshje të mëdha. Ai do të jetë kapiteni ynë dhe do të bëjë më të mirën si në ndeshjet e tjera. Hysaj është lojtar i ri, por ai është lojtar me eksperiencë. Por me rëndësi është që ai na ndihmon si lojtar dhe si kapiten”,u shpreh Abrashi për Hysajn.
Sa i përket Francës, ai u shpreh se këtë skuadër e njohhin më mirë se të tjerat dhe se nuk do të përsërisin gabimet si me Zvicrën. “E njohim Francën shumë mirë. E kemi ndjekur edhe në miqësoret që ka zhvilluar, por edhe në takimin e fundit. Gabimet që kemi bërë kundër Zvicrës do t’i përmirësojmë në këtë ndeshje. Do të tregojmë se në dimë të luajmë. Ne kemi treguar që nuk i kemi frikë skuadrat e mëdhaja. Kjo ka ndodhur dhe në dy ndeshjet e fundit me Francën, ku i kemi marrë pikë. Ata kanë presionin. Gabimet duhet ti përmirësojmë dhe ndeshja do të dalë krejt ndryshe. Është motivim i madh të luash për ekipin Kombëtar, nuk është presion“, përfundon Abrashi.
