Partizani do të luajë kundër Laçit, në kuadër të javës së 13-të të Superiores. Fillimisht ishte programuar që kjo sfidë të zhvillohej të premten në orën 18:00, ndërsa më pas u bë me dije që terreni i “Selman Stërmasit” ishte mjaft i rënduar duke e bërë të pamundur zhvillimin e sfidës. Kësisoj kampionët duhet të gjenin një fushë tjetër. Të ndodhur në këto kushte, të kuqtë u dakortësuan të luanin një ditë me pas në “Niko Dovana”.
Por edhe terreni durrsak nuk mban në këto ditë rreshjesh dhe së fundmi është shtyrë ndeshja për të hënën në “Elbasan Arena”. Një rrumpallë që ndodh vetëm në kampionatin shqiptar. Deri “dje”, thuhej gjithmonë ka mungesë stadiumesh kryeqyteti. Po tani që “Air Albania Stadium” është inauguruar, pse duhet të degdisen ekipet e kryeqytetit? Kësaj pyetje, përgjigje mund t’i japin vetëm në FSHF. Fakt mbetet se Partizani si pritës i duhet të luajë në Elbasan, të hënën, në orën 18:00.
