Në prag të ndeshjes së parë të Europa League me Slovan Bratislavën, te Partizani ka dy çështje, që nuk kanë marrë zgjidhje. Më e rëndësishme duket ajo e mesfushorit brazilian, Felipe Gomes, i cili, sipas “Sport Ekspres”, ka 3 rroga pa marrë dhe i ka kërkuar avokatit të tij ta ndjekë çështjen ligjërisht, duke e çuar edhe në FIFA. Braziliani, tashmë i larguar, paguhej 6200 euro në muaj te Partizani, që do të thotë se klubi i kuq i detyrohet me shumën e 18.600 eurove. Një çështje e nxehtë, që duhet zgjidhur urgjentisht, pasi përvoja ka treguar se në të tilla raste mund të ketë pasoja të Mëdha, deri në mospjesëmarrjen e ekipit në Kupat e Europës apo heqje pikësh në kampionat, nëse lojtari nuk likuidohet.
FEJZULLAHU – Çështja e dytë është ajo e Arbnor Fejzullahut, i cili pretendon se i ka përfunduar kontrata, kurse klubi i kuq pohon se ai është ende nën kontratë, kohëzgjatja e së cilës ka qenë 2+1. “Panorma Sport” shkruan se ka dështuar pajtimi mes palëve, pas ballafaqimit që kanë pasur në Dhomën e Zgjidhjes së Konflikteve në FSHF.
