Behar Maliqi, ish-mesfushori i Partizanit në një prononcim për newsport.al ka folur për kohën kur ai lojtari i Partizanit, gjithashtu ai flet me emocione teksa shprehet për paraqitjen e të kuqve në Europë dhe nuk harron të përshëndesë dhe tifozët e shumtë "Ultras-Guerrils".
"Kam dy vite larg Partizanit. Skuadra ka ecur shumë mirë. Çdo vit po ringrihet përditë e më shumë. Besoj se edhe pak i duhet për të qenë aty ku e ka vendin, të bëhet kampion, ta kthejë lavdinë që ka. Unë kam luajtur për Partzanin dhe ia di vlerën atij ekipi, edhe peshën e fanellës. Është privilegj për çdo lojtar", tha Maliqi.
I pyetur për marrëdhëniet që ka me ish-shokët e tij dhe për suksesin e të kuqve në Europë mesfushori nga Kosova tha:
"Kam kontakte me shumë lojtarë të Partizanit. Labinot Ibrahimin e kam mikun më të mirë dhe shpesh flasim dhe takohemi.
Partizani është përmirësuar siç e thash dhe më lart, dhe sukseset në Europë po e tregojnë cilësinë e kësaj skuadre".
Maliqi zbulon edhe një fakt interesant për sa i përket të ardhmes së tij në kampionatin Shqiptar. Ai tregon që ka pasur shumë oferta nga shumë klube, megjithatë ka vendosur të jetë pjesë e Ferronikelit në Kosovë.
"Çdo gjashtë muaj kam pas oferta në Shqipëri, por jam shumë mirë te Feronikeli. Nuk e besoj që do të lëviz", deklaroi Maliqi.
Mesfushori kosovar nuk la pa përmendur edhe skuadrën nga Maqedonia, Shkëndijën e Tetovës.
"Edhe Shkëndija, ashtu si Partizani po na bëjnë krenarë të gjithë shqiptarëve. Shpresoj që të dy ekipet të futen në grupe dhe të shkojnë më lart, se me të vërtetë kanë bërë lojë të mirë".
29-vjeçari nga Prishtina nuk harroi të fliste edhe për tifozët e kuq, ku ai i cilëson si tifozët më të veçantë.
"Guerrils"-at janë tifozë të veçantë. Këtë vit e meritojnë të bëhen kampionë dhe të kenë suksese në Europë se janë lojtari i dymbëdhjetë. Kudo që luan Partizani, aty janë dhe ata. Dëshira imë është që ky vit të jetë i "Guerrils"-ave me sa më shumë trofe", përfundoi Maliqi.
Lexo gjithashtu
