Presidenti i FSHF-së, Armand Duka, është zyrtarizuar pak ditë më parë si kandidat për një vend në Komitetin Ekzekutiv të UEFA-s. Numri 1 i futbollit shqiptar, në intervistën e dhënë për “Top Channel”, mendon se në këtë mënyrë do të ketë mundësinë të kontribuojë me eksperiencën e tij në drejtimin e ftubollit edhe në këtë organizatë ndërkombëtare.
"Janë zgjedhjet për 8 vende në Komitetin Ekzekutiv të UEFA-s dhe për këtë ka disa kandidatë dhe një ndër ta do të jem edhe unë. Duke pasur parasysh eksperiencën e gjatë në FSHF dhe në komitete të ndryshme të UEFA-s mundet që këtë eksperiencë ta shfrytëzoj për më shumë për kontribute për këtë organizatë të përbashkët.
Qoftë edhe ulja në tavolinë e Shqipërisë besoj se është goxha e rëndësishme moralisht. Këtu nuk bëhet fjalë për të mira materiale dhe nuk shkohet në Komitetin Ekzekutiv për të qenë i njëanshëm dhe për të mbrojtur vetëm interesat e Shqipërisë, por shkohet atje për të bërë më të mirën për të gjithë organizatën. Për të dhënë kontributin tënd për zhvillimin e lojës dhe për mënyrën se si duhet të menaxhohet ajo."
Ndërsa mes batutave ai e përfundon intervistën duke thënë se:
"E kemi të sigurt që dy vota të paktën do t’i marrim, votën e Kosovës e konsideroj njësoj si votën e Shqipërisë", ka përfunduar presidenti i FSHF-së intervistën e dhënë në Top Channel.
Lexo gjithashtu
