Jo më kot u shit 1.4 milionë euro. Xhuliano Skukës i mjaftojnë vetëm 10 minuta në fushë dhe lë gjurmë në Francë. Ish-sulmuesi i Partizanit debutoi sot me skuadrën e Metzit duke luajtur në këtë mënyrë ndeshjen e parë në Ligue 2.
Ai u fut në fushë në minutën e 83-të të takimit. Rezultati ishte 1-1 dhe në një stadium të tejmbushur, vendasit tentuan me çdo kusht fitoren. Në minutën e 90-të të sfidës, Skuka u bë protagonist.
Dibrani mori një top nga shokët e skuadrës dhe i vetëm me portierin e dalë, tentoi t’i bëjë parabël këtij të fundit. Edhe pse goditja ishte e mira, sfera nuk përfundoi në rrjetë.
Pikërisht në atë moment, “gardiani” Mpasi u ndëshkua me karton të kuq pas ndërhyrjes së gabuar në dëm të Xhulio Skukës. Pritet me interes se si do të vijojë karriera e Skukës në Francë, i cili është lojtari i parë që shitet për shifrën e 1.4 milionë eurove nga kampionati shqiptar.
Ndeshja mes Metz dhe Rodez përfundoi me rezultatin 1-1, e vlefshme për javën e 21-të të Ligue 2.
