Gjergji Muzaka është një emër i njohur në kampionatin shqiptar. Mesfushori kryeqytetas ka pasur fatin të provojë shijen e derbit me fanelën e Partizanit, por edhe të Tiranës. Në një intervistë speciale për Sport Time, ai tregoi emocionet e kësaj sfide.
U kthye pas në kohë duke treguar se si përjetohej kjo sfidë gjatë kohës kur ata luanin në fushë, ndërsa analizoi shkurtimisht se si vijnë këto dy ekipe në ndeshjen e sotme. Muzaka gjithashtu zbuloi se ka humbur më shumë derbi se sa ka fituar gjatë 8 viteve që ka luajtur për Partizanin.
“Faktikisht derbi fillon që në fillim të javës. Përjetohet një atmosferë krejt ndryshe. Padiskutim është ndeshja më e rëndësishme e kampionatit shqiptar. Pavarësisht renditjes, nuk ka favoritë. Spektakli në derbi është i garantuar. Dihet atmosfera që krijohet në ndeshjet derbi. Megjithatë këtë javë luhet në kushte jo normale për shkak të pandemisë dhe tifozëve. Derbi në përgjithësi e fitojnë tifozët. Në kushte normale vëmendja s’është e përqëndruar vetëm në fushë. Vëmendja më e madhe në shkallët e stadiumit.
Atmosfera? Ne themi që derbi s’ka favoritë për vetë faktin prej tifozëve. Dashje pa dashje barazohen vlerat kur ata janë prezentë. Në një stadium të boshatisur do të ketë favoritë. Ekipi që është më i kompletuar dhe do të bëjë një manovër sulmuese, do të fitojë. Derbi është si një fuçi baruti që pritet nga momenti në moment të shpërthejë. Kjo është ndeshja e parë mes tyre e sezonit dhe nuk është përcaktuese. Jemi akoma në javën e gjashtë dhe kemi shumë rrugë përpara. Mos të harrojmë që Tirana bëri atë pikën e kthesës, ishte shumë më shumë larg vendit të parë se sa tani. Pra është ende herët.
Ndjesia në derbi? Mund të flasim shumë për ndjesinë e derbit, por do të thoja që askush që s’e luan, s’e kupton atë magjinë që të fal, ato emocionet që të jep si aktor i kësaj sfide. Ndihesh shumë i vlerësuar. Lojtarët e rinj afeksionohen dhe lidhen shumë me skuadrat e kryeqytetit.
Tirana apo Partizani? Unë të them të drejtën kam shijuar çdo derbi. Për fatin tim të keq kam humbur derbi se sa kam fituar. Gati 8 vite kam humbur sepse kam luajtur me Partizanin. Asokohe Tirana kishte ekipin më të mirë të të gjithë kohërave. Më pas kur shkova te bardheblutë, Partizani na ka hap punë më shumë se çdo ekip tjetër, edhe pse ra nga kategoria. Derbi që fitohet të shijon më shumë. Nuk ka të luash bukur dhe të luash mirë. Siç është dhe ajo shprehja, derbi nuk luhet, derbi fitohet. Gjatë gjithë karrierës sime më ka shoqëruar shprehja: Humbisni kampionatin, vetëm derbin jo! Ndonjëherë në derbi, kushtet t’i diktonin lojtarët. Vëmendja ishte më shumë te tifozët se sa te loja në fushë.
Përvoja? Në 2001, ishte stadiumi plot. Ishte viti kur Partizani u kthye nga Kategoria e Parë. Dy orë para shkojmë në stadium. Futemi në dhomat e zhveshjes. Një shok i joni del te dritarja dhe sheh stadiumin plot. “Mirë më lla këta s’kanë punë tjetër?”, tha ai atëherë me batutë”.